بھٹکل:12/ستمبر (ایس اؤنیوز)تعلقہ کنڑا ساہتیہ پریشد کے زیر اہتمام سرکاری ہائی اسکول منڈلی میں کنڑا کے مشہور شاعر دینکر دیسائی کے یوم ِ پیدائش کی مناسبت سے کنڑا طنزیہ شاعری کے موضوع پر پروگرام منعقد ہوا۔

پروگرام میں خطاب کرتے ہوئے تعلقہ پریشد کے صدر گنگادھر نائک نے کہاکہ دینکر دیسائی نے کینرا ویلفئیر ٹرسٹ نامی ادارہ قائم کرتے ہوئے تعلیم کی روشنی پھیلائی ہے۔ جن سیوک نامی اخبار کے ذریعے روشن خیال فکر کو اپنے ادبی انداز میں پیش کرتے ہوئے عوام میں بیداری لانے کی کامیاب کوشش کی ہے۔ ہائی اسکول کے صدر مدرس ڈی ٹی گوڈا نے پروگرام کی صدارت کرتے ہوئے کہاکہ میری زندگی میں دینکر دیسائی جیسا شخص بہت کم دیکھا ہے۔ طلبا کو چاہئے کہ وہ دینکر دیسائی کی شاعری کامطالعہ کرتے ہوئے ان کے پیغام کو عام کرنے کی کوشش کریں۔ ہائی اسکول کے طلبا نے دینکر دیسائی کے منتخب کنڑا قطعات کو پیش کیا ۔ استانی منجولا شیرور نے نظامت کی ۔ استاد چن ویر ہوسمنی نے شکریہ اداکیا۔ استاد وی جے نایک، پاؤسکر، سورنا ، ممتانائک شریک تھے۔ دینکر دیسائی کی تصویر پر پھول مالاچڑھاتے ہوئے پروگرام کا افتتاح ہوا۔