بھٹکل:2/ ستمبر(ایس اؤ نیوز) تعلقہ کنڑا پریشد بھٹکل اور آنند آشرم پی یوکالج بھٹکل کے اشتراک سےکنڑا زبان ، ادب اور ثقافت پر مشتمل ’’ تھٹ انت ھیلی‘‘(برجستہ جواب دو)کوئز مقابلہ کامیابی کے ساتھ انعقاد ہوا۔
اگیانیشوری ایجوکیشن کالج کے پرنسپال ڈاکٹر آر نرسمہا مورتی نے کوئز مقابلے کا افتتاح کرنےکے بعد خطاب کرتے ہوئے کہاکہ طلبا کو کنڑا ادب کی طرف ترغیب دلانے کے لئے ایسے مقابلوں کا اہتمام قابل ستائش اور مفید ہوتاہے۔ ضلع ورکنگ جرنالسٹ اسوسی ایشن کے صدر رادھا کرشنا بھٹ مہمان خصوصی تھے تو کنڑا ادبی پریشد کے صدر گنگادھر نائک نے صدارت کی۔ آنند آشرم پرائمری اسکول کی صدر مدرسہ سسٹر سریتا تھورس ، سپرئیر سسٹر آروگیمااور پریشد کے اعزازی سکریٹری ایم پی بھنڈاری موجود تھے۔
تعلقہ کے مختلف ہائی اسکولوں کی 11ٹیمیں کوئز مقابلے میں شریک ہوئیں۔ جن میں شری ولی ہائی اسکول چترا پور، اول ۔ جنتا ودیالیا مرڈیشور دوم اور جنتا ودیالیاشرالی اور آنند آشرم ہائی اسکول کے طلبا نے سوم انعام حاصل کیا۔ کوئز میں شریک ہوئے تمام اسکولوں کے طلبا کو سند اور کتابیں بطور انعام دی گئیں۔ الفاظ کا خزانہ ، محاور ے اور کہاوتیں ، ضرب الامثال ، کنڑا ادباء ، الفاظ کا جوڑ، ادیبوں اور کنڑا تصنیفات پر مشتمل کل 8مرحلوں میں کوئز مقابلہ کا اہتمام کیاگیا تھا۔ طلبا نے ریاستی ترانہ پیش کیا۔ ایم پی بھنڈاری نے استقبال کیا۔