بھٹکل:مسجدوں کو دیکھنے اور افطار میں شرکت سے روح کو تازگی ملتی ہے:عوامی افطار پارٹی میں سی پی آئی سریش نایک کا اظہار خیال
بھٹکل:10/جون (ایس اؤنیوز)مساجد کے خلاف عوام میں جو غلط فہمیاں ہیں انہیں دور کرنے کا بہترین ذریعہ یہی ہے کہ انہیں راست طورپر مساجد کا نظارہ کرنے کا موقع دیا جائے ، جس طرح آج ہمیں یہاں مسجد کے اندر افطار میں شرکت کرنے کا موقع دیتے ہوئے مسجد کا نظارہ بھی کرایا گیا یقینا ً اس سے عوام کی سوچ میں تبدیلی ہوگی۔ ان خیالات کا اظہار بھٹکل کے سی پی آئی سریش نایک نے کیا۔
وہ یہاں جماعت اسلامی ہند بھٹکل،جامع مسجد احمد سعید ہرلی سال اور سدبھاؤنا منچ بھٹکل کے اشتراک سے ہرلی سال کے جامع مسجد احمد سعید میں منعقدہ عوامی افطار اور نظارہ مسجد پروگرام میں بحیثیت مہمان خصوصی شریک ہوکر خطاب کررہے تھے۔ انہوں نے کہاکہ ہر مذہب میں اچھی اور مثبت سوچ کے لوگ اکثریت میں ہیں ، چند گنے چنے افراد راستہ بھٹک جانے سے پورے طبقہ کے لوگوں کو نشانہ بنا کر الزام لگانا صحیح نہیں ہے ، روزے کا اختیار کرنے سے سماج میں بھلائی کی تعمیر کاکام ہونا چاہئے۔
سدبھاؤنامنچ بھٹکل کے ناظم محمد رضا مانوی نے اس موقع پر خطاب کرتے ہوئے کہاکہ بھٹکل مساجد کا شہر کہلاتاہے ، مسجدوں کے ذریعے صرف ایک اللہ کی عبادت اور سماج کے اصلاحی کاموں کو انجام دیا جاتاہے۔ میڈیا جس طرح کی زہر افشانی کرتے ہوئے مساجد کو بدنام کررہاہے ایسے کسی کام کا تصور تک نہیں کیا جاسکتا۔ مسجد کے میناروں سے گونجنے والی اذانیں انسانوں کو بھلائی اور کامیابی کی طرف دعوت دیتی ہیں افسوس کی بات یہ ہے کہ اذانوں کے کلمات کا مطلب ہم سے اکثر نہیں جانتے جس کی وجہ سے بعض غلط فہمیاں پیدا ہوتی ہیں انہیں غلط فہمیوں کو دور کرنےکے لئے ایسی تقریبات کو انعقاد کرنے کی بات کہی۔ مسجد احمد سعید کے خطیب و امام مولانا محمد جعفر فقی بھاؤ ندوی نے خطاب کرتے ہوئے کہاکہ رمضان المبار ک کے مہینےمیں جرائم صفر کے درجے پر پہنچ جاتے ہیں کیونکہ روزے کی حالت میں انسان خوف خدا کو محسوس کرتاہے، اسی حالت کو ساری زندگی میں اختیار کرنےکی تربیت اس ماہ میں دی جاتی ہے تاکہ ہماری پوری زندگی رمضان کی طرح ہوجائے۔ انہوں نے عوام سے مخاطب ہوکر کہاکہ سال میں ایک ماہ تک ہی نہیں بلکہ پوری زندگی میں رمضان کی برکتوں سے استفادہ کریں۔ جماعت اسلامی ہند بھٹکل کے امیر مقامی مجاہد مصطفیٰ نے پروگرام کی صدارت کی۔ پروگرام کی نگرانی احمد سعید مسجد کے سکریٹری مولانا ضیاء الرحمن ارکن الدین ندوی نے کی۔ اس موقع پر کنڑا ساہتیہ پریشد بھٹکل کے صدر گنگادھر نائک، گروسدھیندر کالج کے پرنسپال ڈاکٹر نرسمہا مورتی ، ماہر چشم ڈاکٹر ستیش، سماجی کارکن ڈاکٹر آر وی صراف، کنڑا ادیب ماناسوت ہیگڈے ، ناظم ضلع محمد طلحہ سدی باپا، ویلفئیر پارٹی کے محمد یونس رکن الدین، مولانا سید یاسر ندوی وغیرہ موجود تھے۔
تمام مہمانوں نے تقریب کی ستائش کرتے ہوئے کہاکہ جس طرح آج ایک ساتھ ہندو مسلم بیٹھ کر افطار کئے ، مل جل کر باتیں کیں،مسجد کا نظارہ کرنے کے ساتھ ساتھ نماز کی ادائیگی کو بھی آنکھوں سے دیکھا ، یقیناً یہ ایک روح پرور منظر تھا، ایسے موقع باربار الگ الگ موقعوں پر ہونا چاہئے، تاکہ آپسی تعلقات مضبوط ہوں ہمیں یہ کبھی نہیں بھولنا چاہئے کہ آخر ہم سب انسان ہیں۔