بھٹکل میں 17مارچ کو جے ڈی ایس کا عوامی اجلاس : کمار سوامی سمیت کئی لیڈران کی شرکت
بھٹکل:15/ مارچ (ایس اؤنیوز)اس مرتبہ ریاست کرناٹکا میں عوام کا رجحان جنتا دل سکیولر کی طرف ہے ، 17مارچ کو 12بجےشہر کے انجمن ہائی اسکول گراؤنڈ میں پارٹی کے ریاستی صدر کمار سوامی کی موجودگی میں بڑا عوامی اجلاس منعقد کیا جارہا ہے، اس بات کی اطلاع جے ڈی ایس بھٹکل کے صدر عنایت اللہ شاہ بندری نے دی ۔
جے ڈی ایس دفتر میں پریس کانفرنس کے ذریعے بات کرتے ہوئے عنایت اللہ نے کہاکہ 17مارچ کو منعقد ہونے والے جے ڈی ایس اجلاس میں 8سے 10ہزار لوگوں کے شرکت کی توقع ہے، انہوں نے مزید بتایا کہ پروگرام میں جے ڈی ایس کے لیڈران مدھو بنگارپا ، آنند اسنوٹیکر، ششی بھوشن ہیگڈے ، ضلعی صدر بی آر نائک شریک ہوں گے۔ عنایت اللہ نے کہاکہ پروگرام کے بعد کمار سوامی مجلس اصلاح وتنظیم میں شہر کے ذمہ داران سے ملاقات کریں گے۔
عنایت اللہ نے بتایا کہ بھٹکل میں اتی کرم داروں کا مسئلہ سنگین ہوگیا ہے ، وزیر دیش پانڈے اس مسئلہ کو حل کرنے کے لئے کوئی قدم نہیں اُٹھارہے ہیں، مقامی نوجوان بے روزگاری سے پریشان ہیں ، یہاں صنعت کاری کے قیام کی اشد ضرورت ہے.
انہوں نے کہا کہ پڑوس کے کنداپور میں این اے سروے کی کارروائی بہت ہی آسان ہے مگر اترکنڑا ضلع میں عوام اپنی زمینات کی این اے کے لئے سرکاری دفاتر کے چکر کاٹنےپر مجبور ہیں۔ انہوں نے کہا کہ وہ کمار سوامی کے دورے کے موقع پر ان سب مسائل کا تذکرہ کریں گے۔ انہوں نے دعویٰ کیا کہ آئندہ انتخابات میں جے ڈی ایس کی جیت یقینی ہے اور اقتدار جے ڈی ایس کے ہاتھوں میں ہوگا۔ اس موقع پر انہوں نے اعتماد جتاتے ہوئے کہاکہ کمارسوامی کا وزیر اعلیٰ بننا اور ان کا (عنایت اللہ شاہ بندری ) کا انتخاب میں جیت درج کرنا یقینی ہے۔
پر یس کانفرنس میں کئی اخبار نویسوں نے سوالات کئے جس کا انہوں نے جواب دیا۔ ایم ڈی نائک، ایشور نائک،وینکٹیش نائک، کرشنانند پائی ، جے ڈی ایس یوتھ مورچہ صدر پانڈو نائک، شنکر نائک، وی آر نائک ، دیاویا نائک وغیرہ موجود تھے۔