بھٹکل جماعت المسلمین کے سرگرم رکن جان عبدالرحمن کا سرکاری اسکولوں کا دورہ؛ غریب بچوں میں تقسیم کیا عیدی عطیہ
بھٹکل:17/جولائی (ایس اؤنیوز) عید الفطر کی خوشی کے موقع پر بھٹکل جماعت المسلمین کے سرگرم رکن اور سابق جنرل سکریٹری سمیت مختلف سماجی اداروں سے منسلک معروف شخصیت جناب جان عبدالرحمن محتشم نے گذشتہ روز تعلقہ کے مٹھلی اور تلاند سرکاری اسکولوں کا دورہ کرتے ہوئے فی طلبا 200روپئے عیدی عطیہ فراہم کرتے ہوئے بچوں میں خوشی کی لہر دوڑا دی۔ دو اسکولوں کے جملہ 153طلبا کو دو دو سو روپیہ نقد رقم عطیہ فراہم کیا تو بچوں کی خوشی کا ٹھکانہ نہ رہا، اسی طرح اسکول کے اساتذہ بھی اس موقع پر کافی مسرور نظر آئے۔ ساتھ ساتھ انہوں نے مٹھلی سرکاری اسکول کو کمپیوٹر کی خریداری کے لئے 30ہزار روپئے اورتلاند اسکول میں پینے کے پانی کی سہولت مہیا کرانے واٹر فلٹر سمیت کرسی ، ڈسک وغیرہ کی خریداری کے لئے بھی 20ہزار روپئے کی امداد دی۔
موصوف بعد میں موڈبھٹکل لوئز پرائمری اسکول کے 50 بچوں، بینمدور کے30 بچوں اورسبتےکے ہیرور اسکول کے 42طلبا کو بھی فی کس دو دو سو روپئے کا عطیہ دیا ، اسی طرح ہنمدور اور ہیرور اسکول میں پینے کے پانی کےلئے واٹر فلٹر کی خریداری کے لئے فی اسکول 10ہزارروپئے نقد رقم فراہم کی۔
اس دوران گفتگو کرتے ہوئے انہوں نےکہاکہ میرا مقصد غریبوں کی مدد کرنا ہے، مزید کہا کہ وہ ہر عید کے موقع پر اس طرح کے امدادی کام کرتے رہے ہیں۔ انہوں نے کہا کہ چند سال قبل تک بھٹکل میں ہندومسلم مل جل کر پروگرام منعقد کیا کرتے تھے، وقت گزرتے ہم ایک دوسرے سے دور ہوتے جارہے ہیں، انہوں نے زور دیا کہ ہمیں ایک دوسرے کے قریب آنے کی ضرورت ہے اور آپسی بھائی چارگی کو بڑھانے کی ضرورت ہے۔
اس موقع پر بلدیہ صدر محمد صادق مٹا، نائب صدر کے ایم اشفاق، تنظیم کے جنرل سکریٹری محی الدین الطاف کھروری ، بھٹکل مسلم یوتھ فیڈریشن کے صدر امتیاز ادیاور، بھٹکل کبڈی اسوسی ایشن کے سکریٹری شری دھر نائک، موڈبھٹکل اسکول ترقی بورڈ کے صدر وینکٹیش دیواڑیگا، کٹے ویرا یوتھ شکتی سنگھ کے صدر ہنومنت نائک، راگھویندرا اڈگا، بشیر دامدا، ارشاد خطیب، گجانن نائک، کرشنانائک سمیت کئی لوگ موجود تھے۔