بھٹکل جالی پٹن پنچایت کے لئے تنظیم کی جانب سے عمران لنکا صدر اور شمیم بانو نائب صدر اُمیدوار
بھٹکل 28/ ستمبر (ایس او نیوز) بھٹکل جالی پٹن پنچایت کے صدارتی انتخابات کل جمعرات 29/ستمبر کوجالی پنچایت دفتر میں منعقد ہوں گے، جس کے لئے سماجی ادارہ مجلس اصلاح وتنظیم نے صدارتی اُمیدوار کے طور پر عمران لنکا کو میدان میں اُتارا ہے جبکہ نائب صدر کے عہدہ کے لئے جالی پنچایت کی سابق صدر شمیم بانو کو نامزد کیا ہے۔
تنظیم انتظامیہ، سیاسی پینل اور جالی پٹن پنچایت کے ممبران پر مشتمل آج بدھ صبح تنظیم ہال میں منعقدہ میٹنگ میں عمران لنکا صدارتی عہدہ کے لئے بلامقابلہ منتخب ہوگئے، جبکہ نائب صدر کے عہدہ کے لئے شمیم بانو حوالدار بھی بلامقابلہ منتخب ہوئی۔ بتایا گیا ہے کہ صدارتی اُمیدوار کے لئے عمران لنکا کے ساتھ ساتھ سابق ضلع پنچایت ممبر عبدالرحیم کا نام پنچایت کے ایک ممبر نے پیش کیا تھا، مگر کسی نے تائید نہیں کی، بتایا گیا ہے کہ عبدالرحیم خود بھی اس میٹنگ میں غیر حاضر رہے اس طرح عمران لنکا بلامقابلہ منتخب ہوگئے۔ نائب صدر کے عہدہ کے لئے بھی صرف ایک نام شمیم بانو حوالدار کا ہی پیش ہوا تھا، اس بناپر وہ بھی بلامقابلہ اس عہدہ کے لئے نامزد کی گئی۔
میٹنگ میں سیاسی پینل کے کنوینر عبدالرقیب ایم جے ندوی نے خطاب کرتے ہوئے جالی علاقہ کے مسائل پیش کرتے ہوئے بتایا کہ متعلقہ علاقہ کے عوام کچروں کی نکاسی، ڈرینیج سمیت آتی کرم جگہوں کے مسئلہ پر سخت پریشان ہیں، انہوں نے جالی پنچایت ممبران سمیت نو منتخب ہونے والے صدر اور نائب صدر پر زور دیا کہ وہ عوام کے متعلقہ مسائل حل کرنے کی طرف خصوصی توجہ دیں۔ انہوں نے اتحاد اور اتفاق کا درس دیتے ہوئے بتایا کہ کوئی بھی معاملہ پیش آنے کی صورت میں تنظیم کے ذمہ داروں اور سیاسی پینل سے صلاح ومشورہ کریں۔
میٹنگ کی صدارت تنظیم کے نائب صدر عنایت اللہ شاہ بندری نے کی، اس موقع پر تنظیم میٹنگ کا پورا ہال کچا کچ بھرا ہوا تھا۔
خیال رہے کہ جالی پٹن پنچایت میں کل 20ممبران ہیں جس میں مجلس اصلاح و تنظیم بھٹکل کے 11 ممبران ،5 کانگریس ، تین بی جے پی اور ایک آزادامیدوار ہے۔اس مناسبت سے یہ بات تقریبا طئے مانی جارہی ہے کہ تنظیم کی جانب سے جو بھی اُمیدوار صدارتی اور نائب صدارتی انتخابات کے لئے اُمیدوار کھڑے ہوں گے، وہی صدر اور نائب صدر کے عہدہ پر فائز ہوں گے۔ واضح رہے کہ جالی پٹن پنچایت میں قریب 4000 مکانات ہیں اوریہاں 19000ہزار سے زیادہ کی آبادی ہے۔