بھٹکل :۲۵/ستمبر (ایس او نیوز) تعلقہ میں نئے سرے سے تشکیل دی گئی جالی پٹن پنچایت کے لئے پہلی مرتبہ صدر و نائب صدر کا انتخاب 29ستمبر کو ہونے جارہا ہے
جالی پٹن پنچایت میں کل 20ممبران ہیں جس میں مجلس اصلاح و تنظیم بھٹکل کے 12حمایتی ممبران اور 5 کانگریس ، تین بی جے پی اور ایک آزادامیدوار ہے۔موصولہ اطلاعات کے مطابق صدر و نائب صدر کے انتخاب میں مجلس اصلاح وتنظیم کا اہم رول ہوگا۔ صدر کا عہدہ پسماندہ اے کے لئے ریزرو ہے، جس کے لئے عمران لنکا اور عبدالرحیم شیخ ریس میں ہونے کی بات کہی جارہی ہے۔ صدر کے انتخاب کے سلسلے میں28/ ستمبر کو تنظیم میٹنگ منعقد کرتے ہوئے اپنے امیدوار کا اعلان کرنے کی توقع ہے۔ یہاں خاص بات یہ ہے کہ کانگریس کے 5ممبران میں سے کم ازکم تین ممبران بھی تنظیم امیدوار کی حمایت کرنا بالکل طئے ماناجارہاہے۔ اس مناسبت سے تنظیم کا اُمیدوار ہی صدر کے عہدے پر جیت کر آنا یقینی ہے۔ نائب صدر کا عہدہ عام خاتون کے لئے مختص ہے۔
شہر بھٹکل سے متصل جالی پٹن پنچایت حدود میں قریب 4000 مکانات ہیں ، 19000ہزار سے زیادہ کی آبادی ہے۔ یہاں کے عوام خاص کر کچرے کی نکاسی کے مسئلہ سے سخت پریشان ہیں۔ جالی پٹن پنچایت علاقہ کے عوام کا کہنا ہے کہ صدر و نائب صدر کے عہدے پر فائز ہونے والا کسی کے دباؤ اور سفارش کے بغیر ایمانداری اور شفافیت کے ساتھ کام کرے اور عوام کے مسائل حل کرنے کی طرف زیادہ توجہ دے۔