بھٹکل:25/جولائی (ایس اؤنیوز)جالی پٹن پنچایت علاقے کے سروے نمبر 202پر کسی بھی صورت میں یوجی ڈی مرکز کو موقع نہ دینے کا مطالبہ لے کر علاقے کے عوام نے جالی پٹن پنچایت دفترکا گھیراؤ کرتے ہوئے سخت احتجاج کیا۔

علاقے کے جالی کے مشرقی و مغربی علاقہ ، ہارن گدے، تنگن ہتلو، دیوی نگر، جنگن گدے ، تلگیری اور دوڈمنے علاقہ کے سیکڑوں عوام کو جیسے ہی اطلاع ملی کہ منگل کو جالی پٹن پنچایت کی عام میٹنگ طئے ہے تو دفتر کا گھیراؤ کرکے مجوزہ منصوبے کے خلاف احتجاج کرتے ہوئے اپنا سخت اعتراض درج کیا۔

احتجاجیوں نے اس موقع پر منصوبے کی خامیوں کو گناتے ہوئے کہا کہ یہ ایک عوامی مخالف منصوبہ ہے، یہ نظام خامیوں سے پُر ہے ، اس نظام کو جاری کرنے سے پینے کا پانی اور پانی کے کنوئیں گندے ہوجاتے ہیں، بیماریوں کو راہ ملتی ہے، ایسے منصوبے کی ہمیں کوئی ضرورت نہیں ہے۔ اس کے علاوہ سروے نمبر 202ایک رہائشی علاقہ ہے ، اسکول ہے، درختوں کی کٹائی سے ماحولیات پر برا اثر ہوگا، ہومٹی استھل ، مہا ستی امنور مندر ، ناگ جٹگیشور مندر ہیں، منصوبے سے مذہبی جذبات کو ٹھیس پہنچتی ہے،احتجاجیوں نے پرزورآواز میں کہاکہ آ ج پنچایت کی منعقد ہونے والی عام میٹنگ میں اس تعلق سے لازمی طورپر قرارداد منظور کی جائے ، ورنہ یہاں سے نہیں لوٹنے کی ضد پراڑگئے۔تو لاچار پنچایت کے ذمہ داران اور پنچایت کے صدر عبدالرحیم شیخ نے احتجاجیوں کو تیقن دیا کہ منصوبے کے خلاف آج کی میٹنگ میں قرارداد منظور کرتے ہوئے فیصلہ لیا جائے گاتو احتجاجی وہاں سے لوٹے ۔ چیف سکریٹری وینکٹیش ناؤڈا موجود تھے۔ ہریش نائک، گوڈی منے ، منجوناتھ ڈی نائک، گنپتی نائک ، مہیش کے موگیر، ہریش آچاری ، ایشور موگیر وغیر ہ موجود تھے۔ ایس آئی کوڈگونٹی ، ایس آئی پرمیشورپا کی قیادت میں پولس سکیورٹی کے انتظامات کئے گئے تھے۔

وینکٹاپور میں بھی مخالفت : تعلقہ کے وینکٹاپور دیہات کے ہرلی سال ، کارگدے کے سروے نمبر 110پر یوجی ڈی کاموں کوشروع کئے جانے پر علاقہ کے عوام نے پنچایت دفتر پہنچ کر اپیل سونپی۔ وینکٹ رمن نائک وغیرہ موجود تھے۔ پنچایت صدر عبدالرحیم شیخ نے اپیل قبول کی۔