بھٹکل بلدیہ دکاندار بزنس نہ ہونے سے پریشان؛ میونسپالٹی عمارت میں خصوصی پوجا
بھٹکل:12/ نومبر (ایس اؤنیوز) میونسپالٹی کی کرائے کی دکانوں میں کچھ ماہ سے بزنس نہیں ہورہاہے، لوگ مالی تنگی سے پریشان ہیں ان پریشانیوں سے باہر نکلنے کے لئے بھٹکل میونسپالٹی عمارت کے انڈر گرائونڈ فلور پر دکانداروں اور ملازمین کی طرف سے خصوصی پوجا کا اہتمام کیا گیا۔ بتایا گیا ہے کہ گذشتہ 10برسوں میں بھٹکل کی بلدیہ عمارت میں تین ملازمین ہلاک بھی ہوئے ہیں۔ جس کو دیکھتے ہوئے بلدیہ کے چند ملازمین اور دکانداروں کا ماننا ہے کہ کچھ غلط ہوا ہے، جس کو درست کرنے کے لئے پوجا کرنا ضروری ہے۔ بتایا گیا ہے کہ بلدیہ ملازمین اور دکانداروں نے اپنے خود کے خرچے سے عمارت کے اندر وید مورتی رام چندر بھٹ کی قیادت میں خصوصی پوجا کا اہتمام کیا۔
اس موقع پر بلدیہ دکانوں کی تحویلی کارروائی کے دوران خودکشی سےہلاک ہونے والے رام چندرنائک کے بھائی جائے وقوع پر پہنچ گئے اور یہ کہتے ہوئے اعتراض کیا کہ پوجا کرنے والے لوگ اُن کے خاندان والےنہیں ہیں۔ مگر وہاں موجود پجاری نے اُنہیں یہ کہہ کر مطمئن کرنے کی کوشش کی کہ یہ سب لوگوں کی بھلائی کے لئے کیا جارہا ہے .
واقعہ کے سلسلے میں بلدیہ چیف آفیسر وینکٹیش ناؤڈا نے وضاحت کی کہ یہ سرکاری پروگرام نہیں ہے بلکہ ملازمین اور دکانداروں نے آپس میں مل جل کر اپنے خرچ پر اپنے اپنے عقیدے کے مطابق انجام دی ہے۔
