بھٹکل کے ہیبلے میں ناراض عوام نے لیا رکن اسمبلی کو آڑے ہاتھ؛ احتجاج کے باوجود رکھا گیا دو اسکولوں اور دو کالجوں کا سنگ بنیاد
بھٹکل 16/ڈسمبر (ایس او نیوز) بھٹکل رکن اسمبلی سُنیل نائک کو آج اتوار کو ہیبلے کے لوگوں نے اُس وقت آڑے ہاتھ لیتے ہوئے احتجاج کیا جب وہ وہاں سرکاری ہاڈی زمین پر دو اسکولوں اور دو کالجوں کا سنگ بنیاد رکھنے کے لئے پہنچے تھے۔
احتجاج کرتے ہوئے متعلقہ عوام نے رکن اسمبلی کو بتایا کہ وہ کافی عرصے سے سمندر کنارے چھوٹے چھوٹے مکانات میں رہتے ہیں اور پالتو جانوروں کو سرکاری ہاڑی زمین پر چرنے کے لئے چھوڑا جاتا ہے، مگر سرکار نے ہماری مخالفت کے باوجود جانوروں کے چرنے والے زمین پر سرکاری اسکول اور سرکاری کالج تعمیر کرنے کی منظوری دی ہے جس سے یہاں پر بسنے والے عوام سخت پریشان ہیں۔ عوام نے بتایا کہ بارش کے موسم میں سمندری لہریں جب اوپر اٹھنی لگتی ہیں اور پانی گھروں کی طرف آنے کا خطرہ رہتا ہے تو ہمیں اوپری علاقہ کی سرکاری زمین میں آکر پناہ لینا پڑتا ہے، مگر اب اس پوری زمین کو اسکول اور کالج کے لئے مختص کئے جانے کی صورت میں ہمارا پرسان حال کون ہوگا ؟
رکن اسمبلی سنیل نائک نے جواب دینے کی کوشش کی کہ سرکاری ہاڑی زمین پر کوئی پیڑ پودے نہیں ہیں اور نہ ہی زمین پر کوئی گھاس پوس ہے کہ یہاں جانور کو چرایا جاسکے، دوسری بات یہ کہ سرکاری زمین نجی کاموں کے لئے نہیں دی جاسکتی اور سرکاری اسکول اور کالج تعمیر ہونے کی صورت میں یہاں کے لوگوں کو ہی فائدہ ہوگا، مگر سنیل نائک کی باتوں کو نظر انداز کرتے ہوئے بعض نوجوانوں نے اونچی آواز میں بات کرنے کی کوشش کی تو سنیل نائک بھی طیش میں آگئے اور انہوں نے بھی سخت برہمی کے ساتھ جواب دیا۔ اس دوران کچھ دیر کے لئے گرما گرمی رہی مگر کافی احتجاج کے باوجود سنیل نائک نے یہاں کتور رانی چنما رہائشی اسکول، مرارجی دیسائی رہائشی اسکول، سرکاری ڈگری کالج اورسرکاری آئی ٹی آئی کالج کا سنگ بنیاد رکھا۔
بعد میں جب ایم ایل اے سنیل نائک نے ایک بورویل کی تعمیر کا سنگ بنیاد رکھنے کی کوشش کی تو یہاں بھی عوام نے سخت مخالفت کی اور بتایا کہ بورویل بنائے جانے کی صورت میں اُن کے کنوئوں میں پانی کی سطح کم ہوجائے گی۔ مگر یہاں بھی سنیل نائک نے عوام کو سمجھا بجھاکر بورویل کی کھدائی کے لئے سنگ بنیاد رکھا۔
خیال رہے کہ سابق ایم ایل اے منکال وئیدیا کی مدت میں یہاں دونوں اسکولوں اور کالجوں کے لئے جملہ دس ایکڑ زمین منظور کی گئی تھی اورٹھیک ایک سال پہلے یعنی ڈسمبر 2017 میں بھٹکل دورہ کے موقع پر اُس وقت کے وزیراعلیٰ سدرامیا کے ہاتھوں یہاں کے دونوں اسکولوں اور کالجوں کا پردہ کھینچ کر کام کی شروعات کرنے کی بات کہی گئی تھی، مگر اب جاکر یہاں سنگ بنیاد رکھا گیا ہے۔
یاد رہے کہ دونوں اسکول اور دونوں کالجس اس وقت کرایہ کی عمارتوں پر چل رہے ہیں، مگر ہیبلے میں عمارت تعمیر ہونے کے بعد اسکول اور کالج سرکار کی خود کی عمارت میں منتقل ہوجائیں گی۔
