بھٹکل :۲۸/ستمبر (ایس او نیوز) بھٹکل تعلقہ کی ہاڈولی گرام پنچایت کوسال 2015-2016کا گاندھی گرام پُرسکار ایوارڈ سے نوازا گیا ہے۔ یہ ایوارڈ ہر معاشی سال کرناٹکا حکومت کی طرف سے گرام پنچایت نظام کے تحت گرام پنچایت کی جانب سے علاقہ کی  چوطرفہ ترقی کو دیکھتے ہوئےجاتاہے۔ یہ ایوارڈ سال  2014-2013سے دیا جارہاہے۔

ہاڈولی گرام پنچایت کی طرف سے سرکاری منصوبہ جات کا مکمل نفاذ، عوامی مسائل کی طرف خاص توجہ ، بہترین انتظامیہ اور معاشی ترقی کی نگرانی وغیرہ کو دیکھتے ہوئے ریاستی حکومت کی طرف سے یہ ایوارڈ دیا گیا ہے۔ 2اکتوبر کو بنگلورو ودھان سبھا کے بیانکوئیٹ ہال  میں منعقد ہونے والے اجلاس میں وزیر اعلیٰ سدرامیا اور دیہی ترقی وزیر ایچ کے پاٹل کے ہاتھوں یہ ایوارڈ ہاڈولی گرام پنچایت کے صدر شری دھر منجوشٹی اور پنچایت ترقی افسر ایم کریپا نائک لیں گے۔

تعلقہ کے پہاڑی علاقے کے جنگلات ، کمبری مراٹھی ، درج فہرست ذات گونڈ ، کسانوں  اور بہت ہی پچھڑے علاقے میں بھٹکل رکن اسمبلی ، ضلع پنچایت ممبران ، تعلقہ پنچایت ممبران کی رہنمائی میں متعینہ مدت کے اندر منصوبہ جات کو نافذ کرتے ہوئے بے توجہی کا شکار ہوئے عوام کے مسائل کو حل کرنے کے لئے گرام پنچایت کے صدر، ممبران اور افسران ، عملہ وغیرہ نے سنجیدگی سے کام کرنے کی وجہ سے یہ ایوارڈ ملنے کی بات کہی جارہی ہے۔ خاص کر گرام  پنچایت علاقہ میں 100 فی صد ٹیکس وصولی ، 100فی صد پسماندہ ذات، طبقات کی امداد کا استعمال ، 100فی صد سکال کے تحت عرضیوں پر کارروائی ، حق اطلاع اور عوامی خدمات میں مکمل تعاون ، اصول کے مطابق میٹنگوں کا انعقاد، اسٹانڈنگ کمیٹی ، گرام سبھا، خصوصی گرام سبھا کا انعقاد پورے اہتمام سے کیا جاتا رہاہے۔ دیہات کے 5مضافات کو میدانی بیت الخلاء کا بند کرنا اور امسال 7مضافات میں میدانی بیت الخلاء کو بندکرنے کے لئے کوشاں رہنا ، سال 19-2018تک مکمل دیہات کو پاک صاف کرنا اہم منصوبہ جات میں شامل ہیں۔ اس کے علاوہ دیہات کے مضافات میں دھوئیں کے چولہوں کو بند کرکے انہیں پکوان گیس مہیا کرنا ، جنگلات کے باشندوں کو ان کا حق دلانے کے لئے کمیٹیوں کا تشکیل کرنا بھی گرام پنچایت کی خصوصیات میں شامل ہے۔ 2010میں صدر ہند کے ذریعے نرمل گرام پرسکار پانے والی ہاڈولی گرام پنچایت کو گاندھی گرام ایوارڈ کا ملنا سونے پر سہاگہ ہے۔