بھٹکل میں گوڈس رکشااور بائک کی ٹکر : بائک سوار ہلاک
بھٹکل:16/اکتوبر(ایس اؤ نیوز) گوڈس رکشا اور موٹربائک کے درمیان ہوئے تصادم میں بائک سوار شدید زخمی ہوکر اسپتال لے جانے کے دوران ہلاک ہونے کا واقعہ تعلقہ کے کریکال اسپتال کراس روڈ کے قریب منگل کو پیش آیا ہے۔
مہلوک کی شناخت تعلقہ کے جالی کوڑی کے مکین اکھیلش منجوناتھ موگیر (18) کی حیثیت سے کی گئی ہے۔ اکھیلش دی نیو انگلش پی یو کالج کا متعلم تھا۔ شدید زخمی ہونےکے بعد اکھیلش کو زائد علاج کے لئے منی پال لے جانے کی کوشش کی گئی تھی، مگر کنداپور پہنچنے سے پہلے اُس نے زخموں کی تاب نہ لاکر دم توڑ دیا۔
پولس نے حادثے کی اطلاع ملتے ہی جائے وقوع کا دورہ کرتے ہوئے معائنہ کیا۔
بھٹکل دیہی پولس تھانےمیں کیس درج کرلینےکے بعد جانچ جاری ہے۔ لڑکے کی نعش کو بھٹکل سرکاری اسپتال میں پوسٹ مارٹم کے بعد گھروالوں کے حوالے کی گئی ہے۔
اکھلیش کے والد ماہی گیری کا کام کرتے ہیں، وہ ایک بھائی اور ایک بہن سے بڑا تھا۔
