بھٹکل میں گھرگھر کانگریس پروگرام کے ذریعے کانگریس نے بجایا انتخابی بگل؛ بی جے پی کی پالیسی میں دیکھا گیا بدلائو
بھٹکل:23/ستمبر (ایس اؤنیوز) بلدیہ دکانوں کی تحویلی کارروائی کے ہنگامہ سے استفادہ کرتے ہوئے بی جے پی اور سنگھ پریوار لگاتار انتخابی ماحول کو گرمانے میں مصروف عمل ہے تو کانگریس بھی ودھان سبھا انتخابات کی تیاریوں کو مزید مستحکم کرتے ہوئے عملی میدا ن میں کوڈ پڑی ہے۔ تعلقہ کے بیلنی میں کانگریس کی طرف سے گھر گھر کانگریس پروگرام کا ضلع پنچایت صدر جئے شری موگیر نے افتتاح کرتےہوئے کارکنوں میں انتخابی جوش پیدا کرنےکی شروعات کردی ہے۔
اس موقع پر بلاک کانگریس صدر وٹھل نائک، راما موگیر، تعلقہ پنچایت صدر ایشور نائک،نائب صدر رادھا اشوک وئیدیا، اسٹانڈنگ کمیٹی چیرمن وشنو دیواڑیگا، جالی پٹن پنچایت صدر عبدالرحیم شیخِ ضلع پنچایت ممبر البرٹ ڈیکوستھا، سندھو بھاسکر نائک، تعلقہ پنچایت ممبران جئےلکشمی گونڈ ، میناکشی جٹپا نائک، اے پی ایم سی صدر گوپال نائک، مہابلیشور نائک، کے جی نائک ماروکیری ، ماروتی پاؤسکر، یوتھ کانگریس صدر درگا داس موگیر، لکشمن نائک، کے سلیمان وغیرہ موجود تھے۔
کہا جارہا ہے کہ بی جے پی آئندہ کرناٹکا ودھان سبھا انتخابات کے پیش نظر ساحلی پٹی پر واقع بھٹکل اور منگلورو کو بنیاد بنا کراپنی انتخابی حکمت عملی کو تشکیل دیا ہے ، جس کے نفاذ کے لئےباقاعدہ عملی کام شروع ہوچکا ہے۔جس کو دیکھتے ہوئے گھر گھر کانگریس نامی پروگرام کے ساتھ کانگریس پارٹی بھی میدان میں کود پڑی ہے۔
خیال رہے کہ بی جےپی کے قومی صدر امیت شاہ کے بنگلورو دورہ اوراُترکنڑا ایم پی اننت کمار ہیگڈے کو وزارت پر فائز کرنے کے بعد بی جےپی کی پالیسی میں بدلاؤ نظر آرہا ہے اور وہ ہندوتوا کے ایجنڈے پر عمل پیرا ہوگئی ہے۔ سمجھا جارہا ہے کہ انتخابات کی تکمیل تک بھٹکل اور منگلورو کو لے کر بی جے پی کی طرف سے کسی نہ کسی مسئلے کو لےکر اچھالے جانےکےامکانات نظرآرہے ہیں ۔ گذشتہ ایک ہفتہ میں دومرتبہ ضلعی عہدیداران اور لیڈران کا بھٹکل پہنچ کر کانگریس کے خلاف گرجنا اسی کے تناظر میں دیکھا جارہاہے۔