بیچ سمندر میں بوٹ میں خرابی؛ توازن کھوکر بہتی ہوئی بوٹ بھٹکل کےنستار ساحل پہنچنے میں کامیاب : تمام 20ماہی گیر محفوظ
بھٹکل:11/اگست (ایس اؤنیوز)گنگولی بندرگاہ سے سمندرمیں مچھلیوں کا شکار کرنے کے لئے نکلی یکشویشوری نامی ماہی گیر بوٹ بیچ سمندر میں اچانک خراب ہوجانے کی وجہ سے توازن کھو بیٹھی اور سمندر میں بہنے لگی، مگر ماہی گیروں نے کافی دقتوں اور پریشانیوں کا سامنا کرتے ہوئے بوٹ کو بھٹکل کے منڈلی نستارتک پہنچانے میں کامیاب ہوگئے۔ یہ واردات آج جمعہ کی شام قریب سات بجے پیش آیا۔
اسے کرشمہ ہی کہاجاسکتاہے کہ بوٹ پر موجود سبھی 20ماہی گیر بحفاظت ساحل پرپہنچنے میں کامیاب ہوگئے ، البتہ بوٹ پر موجود دو ماہی گیرزخمی ہونے کی بھی اطلاع موصول ہوئی ہے جنہیں بھٹکل سرکاری اسپتال میں بھرتی کرایا گیا ہے۔ بتایا گیا ہے کہ کشتی کے پنکھے کو نصب کردہ سافٹ ٹکڑے ٹکڑے ہونے کی وجہ سے کشتی خطرےمیں پڑ گئی ۔ ساحل پر خطرہ میں پھنسی کشتی نظر آنے لگی تو منڈلی ، موگیرکیری ، نستار وغیرہ سے سیکڑوں لوگ دوڑ پڑے اور کشتی کو بحفاظت ساحل پر کھینچ لانے کی کوشش زوروں پر شروع ہوگئی۔ رات کا اندھیرا اور سمندر میں اونچی لہروں کی وجہ سے کشتی کو ساحل پر لانے کے لئے ماہی گیروں کو کافی محنت کرنی پڑی۔ بھٹکل میں ہورہی موسلادھار بارش سے بھی بوٹ کو سمندر کنارے تک لانے میں مشکلات پیش آئی۔ رات قریب دس بجے ملنے والی اطلاع کے مطابق بوٹ کو سمندر کنارے تک لانے میں کامیابی حاصل ہوئی ہے۔ اس تعلق سے ساحلی محافظ دستہ کو خبر کی گئی ہے۔