بھٹکل میونسپالٹی عمارت پر پتھرائو کا معاملہ: پولس عملہ پر حملہ کرنے والوں پر بھی معاملہ درج : کل 4کیس درج
بھٹکل:15/ستمبر (ایس اؤنیوز)بھٹکل کی میونسپالٹی عمارتپر ہوئے پتھراؤ کے دوران پولس عملے پر حملہ کئے جانے کو لے کر اب ایک اور معاملہ درج کئے جانے کی بات سامنے آئی ہے۔ اس طرح اب تک میونسپالٹی عمارت پر پتھرائو اور خودسوزی کرنے کے تعلق سے جملہ چار معاملات درج کئے گئے ہیں۔
خیال رہے کہ 14 ستمبر کو میونسپالٹی عمارت پر پتھراؤ کیا گیا تھا، جبکہ میونسپالٹی دکان کے ایک کرایہ دار کے بھائی رام چندر نائک نے خود سوزی کی کوشش کی تھی۔ خودسوزی کو لے کر رام چندرا نائک کے بھائی کی طرف سے ضلعی افسرا ور بلدیہ افسران کے خلاف معاملہ درج کیا گیا تھا، اسی طرح خودسوزی کرنے کی کوشش کرنے پر رام چندرا نائک پر بھی معاملہ درج کیا گیا تھا، جبکہ میونسپالٹی عمارت پر پتھرائو کئے جانے کو لے کر نامعلوم لوگوں پر کیس درج کئے گئے تھے۔ اس طرح اب پولس پر حملہ کرنے کے تعلق سے چوتھا معاملہ درج کیا گیا ہے۔
پولس تھانہ عملہ گوتم آر کی طرف سے دی گئی شکایت میں کہا گیا ہے کہ جمعرات کی صبح بلدیہ دکانوں کو تحویل میں لئے جانے والی کارروائی کی وڈیو گرافی کرنے کے دوران راگھویندر نائک، گوند نائک، ماروتی ماستپا نائک، شری نواس نائک، سدھاکر نائک، کرشنانند سانی کٹے ، تلسی داس نائک، کمار ایم نائک، اُدئیے دیویا نائک اور ناگراج نائک نے ان کے ساتھ گالی گلوچ کرتے ہوئے چہرے پر پانی پھینک کر حملہ کرنے کی کوشش کی گئی۔
پولس تھانے میں کیس درج کرلینے کے بعد پولس کاروائی کررہی ہے۔ موصولہ اطلاعات کے مطابق بلدیہ دفتر پرہوئے پتھراؤ ، پولس عملے پر حملہ وغیرہ کو لےکر درج کئے گئے مقدمات کے ملزمان کی فہرست میں مزید نام شامل ہوسکتےہیں ، پولس ذرائع سے ملی اطلاع کے مطابق پولس اس تعلق سے تصاویر اور وڈیو کلپس کے سہارے ملزمان کی شناخت کرنے میں لگی ہوئی ہے۔اور انہیں قانون کے دائرے میں لانے کی کوشش کی جارہی ہے۔
