بھٹکل:12/اگست (ایس اؤنیوز)تعلقہ میں جتنے اہل اور غریب لوگوں نے راشن کارڈ کے لئے درخواستیں دی ہیں ان کی جلداز جلد جانچ کرکے متعلقہ خاندانوں کو راشن کارڈ دئیے جانےکی وزیربرائے غذا یوٹی قادر نے افسران کو ہدایات جاری کیں۔

رابطہ تعلیمی ایوارڈ پروگرام میں شرکت کے لئے بھٹکل تشریف لائے یوٹی قادر راشن کارڈ تقسیم کاری کو لے کر تحصیلدار وی این باڈ کر اور محکمہ اغذیہ کے انسپکٹر پروین سے جانکاری حاصل کرے کے بعد بات کررہے تھے۔ راشن کارڈ کے لئے حکومت کی طرف سے پوری وضاحت کی جاچکی ہے۔ 1لاکھ 20ہزار سے کم سالانہ آمدنی والے تمام خاندان بی پی ایل راشن کارڈ کے لئے اہل ہونگے۔ افسران سالانہ آمدنی سرٹیفکٹ کی بنیاد پر آگے کی کارروائی کرلیں اس کام میں کوئی غفلت نہ برتیں۔ اگر کمپیوٹر س کی کمی ہے تو مزید 10کمپیوٹرس نصب کریں، اور عوامی سہولیات کو دیکھتے ہوئے رات 8بجے تک بھی عوام کو راشن کارڈ تقسیم کریں۔ ریاست کے تمام راشن دکانوں میں بیو میٹرک سسٹم نصب کرلیں، اس سلسلے میں افسران کسی پس و پیش میں نہ رہنے کی بات کہی۔ 11اگست تک راشن کارڈ کے لئے 2735درخواستیں موصول ہوئی ہیں، جس میں 528کارڈ وں کی جانچ چل رہی ہے، اس سلسلے میں ولیج اکاؤنٹنٹ کو بھی ہدایات دی گئی ہیں، بقیہ عرضیوں کی جانچ این آئی سی کے بعد کئے جانے کی بات کہی۔ تعلقہ میں 34راشن دکانوں میں سے 17دکانوں پر بیو میٹرک نصب کیا جاچکاہے۔ بقیہ دکان مالکان کی میٹنگ منعقد کرتے ہوئے انہیں حکم دینے کی محکمہ اغذیہ کے انسپکٹر پروین نے موصوف وزیر کوجانکاری دی۔ اس موقع پر دیگر افسران اور پارٹی لیڈران موجود تھے۔