بھٹکل : دیواڑیگا سماج کے ہونہار اور باصلاحیت طلبا کو رہنمائی اور ترغیب کی ضرورت ہے : دنیش دیواڑیگا کا اظہار خیال
بھٹکل :13/ اگست (ایس اؤ نیوز)دیواڑیگا طبقہ میں بے شمار ہونہار اور با صلاحیت افراد ہیں، ان کی صحیح رہنمائی اور ترغیب دینےکی ضرورت ہے۔ ٹاٹا موٹرس لمیٹیڈ کے آر این ڈی شعبہ کے ذمہ دار دنیش گوند دیواڑیگا نے ان خیالات کا اظہار کیا۔
وہ یہاں اترکنڑا ضلع دیواڑیگا سماج ملازمین سنگھا مرڈیشور کے زیر اہتمام تعلقہ کے بینگرے یکش منے دیواڑیگا ہال میں منعقدہ ٹالینٹ ایوارڈ اور تہنیتی ملازمین اجلاس کے پروگرام کا افتتاح کرنے کے بعد خطاب کررہے تھے۔ انہوں نے اپنے خطاب میں دیواڑیگا ملازمین سنگھا کی طرف سےملازمین کی تہنیت کئے جانے کی ستائش کی۔ وہیں انہوں نے طلبا سے کہاکہ جو کچھ سنگھا کی طرف سے تعلیمی وظائف کے طورپر تعاون کیاجارہاہے اس سے بہتر استفادہ کرتے ہوئے سماج میں اعلیٰ مقام حاصل کریں۔ اترکنڑا دیواڑیگا ملازمین سنگھا کے صدر مادیو جی گدے منے نے پروگرام کی صدارت کی۔ بینگرے گرام پنچایت کے صدر وینکٹیا بھئیرو منے ، تعلقہ پنچایت ممبر وشنو دیواڑیگا، سبھدرا دیواڑیگا، کملا کر کوٹد مکی وغیرہ موجود تھے۔ سنگھا کے ممبر لکشمن کوٹد ممکی نے استقبال کرتے ہوئے افتتاحی کلمات پیش کئے ۔ سکریٹری منجوناتھ دیواڑیگانے رپورٹ کی خواندگی کی ۔ ناگیش دیواڑیگا نے نظامت کی۔ ایس ایس ایل سی، پی یو سی، بی بی اے ، بی سی اے ، بی سی ایم میں امتیازی نمبرات سے کامیاب طلبا اور دیگر ہونہار وں اور موظف ملازمین کی تہنیت کی گئی۔