بھٹکل:8/ اکتوبر(ایس اؤ نیوز) ریاست میں ٹھیکدار وں کو سنگین حالات کا سامنا ہے، اس سلسلے میں حکومت کو چاہئے کہ وہ فوری اقدامات کرتے ہوئے حالات کو معمول پر لانے کا مطالبہ لے کر اترکرناٹکا کانٹراکٹر اسوسی ایشن کی جانب سے دھارواڑ میں احتجاج کیاگیا۔
ٹھیکداروں نے احتجاج کے دوران حکومت سے اپیل کی ہے کہ ٹینڈر کے لئے حکومت کی طرف سے عائد کردہ ضوابط کی پیروی نہ کرتے ہوئے من مانی طریقے پر ٹینڈر بلایا جارہاہے۔ ٹینڈر ضوابط ڈبلیو 3اور 4 میں 50لاکھ روپیوں سے زائد کاموں کے لئے 6 ماہ سے زائد کی مدت تعین کرنا ہے ، جو کام 6ماہ کی مدت سے زائد ہوتے ہیں انہیں اسٹار ریٹ دینے کا اصول ہے، مگراس پر کوئی عمل نہیں ہورہاہے۔ ٹینڈردینے کے بعد 30دنوں کے اندر تمام کارروائیوں کو مکمل کرنا ہے ، ایسا نہیں کیا گیا تو ٹھیکداروں پر معاشی بوجھ پڑتاہے۔ مختلف محکمہ جات کے ٹینڈر کے لئے دئیے گئے ورک ڈن سرٹیفکٹ کو تصدیق کے لئے بھیجا جاتاہے تو فوری طورپر اس کے متعلق کارروائی کی جائے۔ ٹھیکدار ٹینڈر سونپنے کے بعد اسی صورت میں اس کو رد کیا جائے جب کہ وہ اس کا اہل نہ ہو۔ غیر ضروری ، اپنے مفادات اور کسی کے دباؤ میں کانٹراکٹر کو رد کرنا صحیح نہیں ہے۔ جب ٹینڈر ہوجاتاہے تو متعینہ مدت میں کام پورا ہونے کے بعد کانٹراکٹر کو بل کی ادائیگی ہو۔ آج کل ٹھیکدار بعض مخصوص کاموں کے لئے مزدوروں کو باہر سے لانا پڑتاہے، موجودہ مزدوری بہت کم ہے اس میں اضافہ کرنے کا ٹھیکداروں نے مطالبہ کرتے ہوئے دھارواڑ زون کے چیف انجنئیر کو میمورنڈم سونپا۔ اس موقع پر اسوسی ایشن کے صدر سبھا ش پاٹل، ضلع سمیتی کے صدر شیام سندر بھٹ، نائب صدر ٹی ڈی نائک وغیرہ موجود تھے۔