بھٹکل میں وزیراعلیٰ سدرامیا کا پرجوش استقبال کرنے ایک دن کے لئے مچھلیوں کا شکار بند : ماہی گیروں کا فیصلہ
بھٹکل:2/ دسمبر(ایس اؤنیوز)6 دسمبر کو بھٹکل تشریف لارہے ریاستی وزیراعلیٰ سدرامیا کا پرتپاک استقبال کرنے اور ان کے پروگرام کو کامیاب بنانے کے لئے بھٹکل اور ہوناور کے ماہی گیروں نے ایک دن کے لئے اپنی ماہی گیری کو بند رکھنے کا فیصلہ لیاہے۔
موصولہ اطلاعات کے مطابق بھٹکل اور ہوناور علاقہ کے تمام ماہی گیرسنگھ کے عہدیداران نے اپنے اپنے طورپر میٹنگوں کا انعقاد کرتے ہوئے رکن اسمبلی منکال وئیدیا کی بھرپور حمایت کرتے ہوئے سدرامیا کے سامنے اپنی قوت کا مظاہرہ کرنے کا طئے کیا ہے۔ ذرائع کے مطابق ماوین کوروے ، تنگنگن گنڈی ، الویکوڑی اور ہوناور کے کاسرگوڈ بندرگاہوں پر ایک دن کے لئے کوئی بھی ماہی گیر بوٹ, مچھلیوں کے شکار کے لئے سمندر میں نہیں اتریں گے۔ ماہی گیر عہدیداروں کی مانیں تو وزیرا علیٰ سدرامیا کے پروگرام میں ماہی گیروں کو درپیش مسائل کے حل کی مانگ کرتے ہوئے انہیں درخواست دینے کے امکانات ہیں۔
آئندہ ہونےو الے ودھان سبھا انتخابات کے پیش نظر ماہی گیروں کا یہ فیصلہ عوامی سطح پر تجسس کا سبب بنا ہے۔ خیال رہے کہ گذشتہ ودھان سبھا انتخابات کے دوران مقامی ماہی گیروں نے اپنے تمام کاموں کو بالائے طاق رکھتے ہوئے بڑی تعداد میں پولنگ کی تھی ، ماناجاتاہے کہ رکن اسمبلی کی جیت میں ان کا بڑا رول رہاہے۔