بھٹکل:24/اپریل(ایس اؤنیوز)ٹیکس وصولی کے معاملے کو لے کر بھٹکل ٹائون پولس نے میونسپالٹی کے کرایہ وصولی کرنے والے ٹھیکدارکو گرفتار کرکے عدالتی تحویل میں بھیجے جانے کا واقعہ آج پیر کی شام کو پیش آیا ہے۔ گرفتار شدہ شخص کی شناخت شاذِر ائیکری کی حیثیت سے کی گئی ہے۔

 پولس نے بتایا کہ متعلقہ ٹھیکدار ترکاری فروش عورت کے ساتھ ٹیکس معاملے کو لے کرتکرار کرتے ہوئے زائد ٹیکس کا مطالبہ کررہا تھا، بعد میں متعلقہ ترکاری فروش کو گالیاں دیتے ہوئے اُس کے بال پکڑتے ہوئے اُسے دھمکیاں دی، جس پر متعلقہ عورت نے بھٹکل شہری پولس تھانہ پہنچ کر  شکایت درج کی جس پرکاروائی کرتے ہوئے  پولس نے شاذِر کو گرفتار کرلیا۔ 

پولس تھانہ میں درج  شکایت کے مطابق ملزم کے ایم شاذر (شاذِر ائیکری ) نے 16اپریل کی صبح 7بجے بھٹکل مین روڈ پر اربن بینک کے سامنے ترکاری بیچنے والی منکولی ، رگھوناتھ روڈ کی مکین لکشمی کرشنپا نائک (65) کے ساتھ بحث کرتے ہوئے 2فی صد ٹیکس پر زور دیا۔ پھر عوامی جگہ پر عورت کو روک کر اُس کے بال کھینچتے ہوئے اُس کی بے عزتی کی اور  گالی گلوج کرتے ہوئے ٹیکس ادا نہ کرنے پر جان سے مارنے کی دھمکی دی ۔بھٹکل سرکل پولس انسپکٹر سریش نائک کی ہدایت پر پی ایس آئی انپا موگیر نے کیس درج کرلینے کے بعد  ملزم شاذر ائیکری کو گرفتارکرلیا  پھر عدالت میں پیش کرتے ہوئے اُسے عدالتی تحویل میں بھیج دیا گیا۔ پولس مزید چھان بین کررہی ہے۔