بھٹکل 15/اگست (ایس او نیوز) ہر سال کی طرح امسال بھی بھٹکل میں پورے جوش و خروش کے ساتھ  یوم آزادی کی تقریب منائی گئی اور تعلقہ انتظامیہ سمیت مختلف سرکاری اور غیر سرکاری اداروں سمیت تعلیمی اداروں میں بھی  ترنگا جھنڈا لہرایا گیا۔

بھٹکل تعلقہ انتظامیہ کی جانب سے بھٹکل کے تعلقہ اسٹڈیم المعروف نوائط کالونی کے وائی ایم ایس اے میدان میں  صبح ٹھیک نو بجے یوم آزادی کی تقریب کا آغاز ہوا۔ 

بھٹکل اسسٹنٹ کمشنر ساجد مُلّا نے  ترنگا جھنڈا لہراکر پولس سے سلامی قبول کرنے کے بعد اپنے خطاب میں کہا کہ  ہمارا ملک ہندوستان اس وقت تیزی کے ساتھ ترقی کی راہ پر گامزن ہے، مگر ہمیں مزید کئی میدانوں میں ترقی کرنی ہے۔ انہوں نے کہا کہ ہمارا  بنیادی ڈھانچہ کافی مضبوط ہے، مگر اسے ہمیں مزید مضبوط کرنا ہے۔ آزادی کے بعد ہمارے ملک نے کئی محاذوں میں کامیابی حاصل کی ہے ، مگر ملک کے عوام کو بھی انتظامیہ کے ساتھ تعائون کرنے کی ضرورت ہے ، انہوں نے بالخصوص صاف صفائی کی طرف عوام الناس کی توجہ مبذول کرائی اور کہا کہ عوام اگر اپنے اپنے علاقوں کو صاف  رکھیں گے اور پلاسٹک کا استعمال بند کریں گے تو شہر خود بخود  کچروں سے پاک  ہوجائے گا۔

بھٹکل رکن اسمبلی سُنیل نائک  نے خطاب کرتے ہوئے جاپان کی ترقی کا تذکرہ کیا اور کہا کہ جاپان کے ہیروشیما اور ناگاساکی میں  بمباری کرکے اُس ملک کو برباد کردیا گیا تھا، مگر اُس ملک کے عوام نے تیزی کے ساتھ  ترقی کرتے ہوئے پوری دنیا میں اپنی ایک شناخت قائم کرکے دکھادیا کہ محنت اور لگن سے سب کچھ ممکن ہے۔ سنیل نائک نے کہا کہ ملک کے باشندوں کو چاہئے کہ وہ صرف 15/اگست کو ہی ملک کی آزادی کو یاد نہ کریں بلکہ ہرروز ہمیں  اپنے ملک کی آزادی  اور اُس وقت کے حالات کو ذہن میں رکھنے چاہئے۔ بی جے پی رکن اسمبلی نے سوامی وویکانند کا تذکرہ کرتے ہوئے اُن کے خیالات اور اُن کے بتائے ہوئے طریقوں پر عمل کرنے کی صلاح دی۔

بھٹکل تحصیلدار وی این باڈکر نے استقبالیہ کلمات پیش کئے، آخر میں اسکول ٹیچر شری دھر شیٹ نے شکریہ ادا کیا۔

پروگرام میں ہمیشہ کی طرح اس بار بھی پولس کے ساتھ ساتھ اسکولی بچوں نے مارچ فاسٹ میں حصہ لیا۔ 

عوام الناس بالخصوص مسلمانوں کی کثیر تعداد پروگرام میں شریک رہی۔

سرکاری اور غیر سرکاری اداروں میں پرچم کشائی:   یوم آزادی کے موقع پر  بھٹکل کے سبھی سرکاری اداروں سمیت  کئی ایک غیر سرکاری اداروں میں بھی پرچم کشائی کی گئی۔ بھٹکل میونسپالٹی،  پنچایت دفتر، پولس اسٹیشن، تحصیلدار آفس کے ساتھ ساتھ قومی سماجی ادارہ مجلس اصلاح و تنظیم، ایس ڈی پی آئی وغیرہ اداروں میں بھی ترنگا جھنڈالہراتے ہوئے آزادی کے مجاہدوں کو خراج عقیدت پیش کی گئی۔

بھٹکل کے سبھی اسکولوں اور کالجوں میں بھی یوم آزادی کی تقریب دھوم دھام سے منائی گئی اورملک کو آزادی دلانے والے مجاہدوں کے تعلق سے اسکول اساتذہ نے معلومات بہم پہنچاتے ہوئے اُنہیں خراج تحسین پیش کیا۔ کئی ایک اسپورٹس سینٹروں نے بھی اپنے اپنے علاقہ میں پرچم لہراتے ہوئے یوم آزادی کی تقریب منائی۔