بے کار پڑا ہے بھٹکل بندر پر پینے کے صاف پانی کا مرکز۔ 12لاکھ روپے کا تخمینہ۔ ادھورا پڑا ہے منصوبہ
بھٹکل 15؍دسمبر (ایس او نیوز)بھٹکل تعلقہ کے ماوین کوروے علاقے میں واقع بندرگاہ پر پینے کے صاف پانی کا ایک مرکز 12لاکھ روپے کی لاگت سے تعمیر کرنے کا منصوبہ شروع ہوئے دو سال کا عرصہ گزرچکا ہے۔ ٹھیکے دار کی غفلت اور افسران کے کاہلی کی وجہ سے ابھی تک یہ منصوبہ پورا نہیں ہوا ہے اور عوامی استعمال کے لئے دستیاب نہیں ہوسکا ہے۔
بتایاجاتا ہے کہ بندرگاہ کے علاقے میں ایس ڈی سی پروگرام کے تحت پینے کے پانی کے اس پروجیکٹ کی تعمیر کاکام گجرات کے کسی ادارے کو سونپا گیا تھا۔ لیکن گزشتہ دو سال قبل شروع کیا گیا یہ تعمیری کام ابھی تک تکمیل کو نہیں پہنچا ہے۔بندرعلاقے کے ایک مقامی باشندے رام کھاروی نے بتایا کہ اس علاقے میں پینے کے صاف پانی کی اشد ضرورت ہے۔اس منصوبے کی وجہ سے عوام کو راحت ملنے کی امید تھی، مگر اب تک صرف انتظار کے سوا ہمیں کچھ نہیں ملاہے۔اس کام کو جلد ازجلد پورا کرنے کے لئے ٹھیکیدار کمپنی پر دباؤ بنانا چاہیے ۔لیکن سرکاری افسران اس طرف توجہ نہیں دے رہے ہیں اور سرکاری فنڈضائع ہورہی ہے۔
متعلقہ مقام کا معائنہ کرنے پر پتہ چلا ہے کہ کام کے آغاز میں جو ساز و سامان یہاں لایا گیا تھا اب اسے زنگ لگنا شروع ہوگیا ہے۔ اور ادھورا تعمیراتی کام عوام کے لئے بے فائدہ ہوکر رہ گیا ہے۔