ممبئی میں منعقدہ آل انڈیامسابقہ قرات قران میں بھٹکل جامعہ اسلامیہ کے طالب العلم کا شاندار پرفارمینس؛ ملا اول مقام
بھٹکل 11/مارچ (ایس او نیوز) ادارہ دعوۃ السنہ کے زیر اہتمام ممبئی میں منعقدہ ۲۱ویں آل انڈیا مسابقۃ القرآن الکریم کے قرات مقابلہ میں بھٹکل جماعت المسلمین کے نائب قاضی مولانا عبدالعظیم قاضیا ندوی کے فرزند اور مکتب جامعہ اسلامیہ کارگیدے بھٹکل کے طالب العلم حافظ جعفرقاضیا نے بہترین قرات کا نمونہ پیش کرتے ہوئے اول مقام حاصل کیا ہے اور نہ صرف ریاست کرناٹک، بلکہ بھٹکل اور اپنے مدرسہ جامعہ اسلامیہ کا بھی نام روشن کردیا ہے۔ حافظ جعفر کو اول مقام آنے پر انہیں اور ان کے والدین کو عمرہ کی ادائیگی کا انعام دیا گیا ہے۔ جبکہ عمرہ کے لئے اگر پاسپورٹ نہ بنا ہو تو پاسپورٹ بنوانے کے لئے بھی ہر طرح کے تعائون کا اعلان کیا گیا ہے۔
ذرائع سے ملی اطلاع کے مطابق مسابقہ قرات کے آخری دن ہندوستان کی مختلف ریاستوں اور الگ الگ مدرسوں کے 35 طلبہ نے حصہ لیا تھا، جبکہ حفظ قران مسابقہ میں 41 بچوں نے حصہ لیا۔
قرات کے شعبہ میں حافظ جعفر نے زبردست پرفارمینس پیش کرتے ہوئے اول مقام حاصل کیا۔ ممبئی میرا روڈ کے دارالعلوم سلیمانیہ کے محمد اسماعیل ابن محمد صادق نے دوسرا انعام اور پاڑے گائوں کے درالعلوم حمیدیہ تعلیم القران کے محمد عامر ابن شوکت کو تیسرا مقام حاصل ہوا۔ صبح دس بجے سے عصر تک لگاتار مسابقہ جاری رہا جس میں طلبہ نے اپنے فن کا بہترین مظاہرہ کیا اور طلبہ کی اکثریت نے تجوید و قرات کی مکمل ادائیگی و پاسداری کی۔
فرح حفظ میں پہلی پوزیشن محمد سعد ابن مفتی ابرا ر احمد متعلم جامعہ ابن عباس گونا ایم پی، دوسری پوزیشن محمد عمیر ابن حافظ محمد مرتضی متعلم جامعہ محمدیہ احمد نگر اور تیسری پوزیشن محمد سعد ابن حافظ محمد احسن مدرسہ تذکرۃ العلوم دہلی نے حاصل کی۔ حفظ میں بھی اول آنے والے طالب العلم اور ان کے والدین کو عمرہ کی ادائیگی کا انعام دیا گیا ہے، جبکہ دوسرا اورتیسرا مقام حاصل کرنے والوں کو بھی گرانقدر انعامات سے نوازا گیا ہے۔
ذرائع سے ملی اطلاع کے مطابق بھٹکل سےجملہ سات طلبہ نے مسابقہ میں حصہ لیا تھا۔
مسابقہ میں حکم کے فرائض مولانا مفتی محمد شافع عارفی ، مولانا حذیفہ قاسمی اور قاری سیف الباری نے انجام دیا جبکہ ممتحن مولانا ذیشان الاسلام ندوی تھے دیگر ممتحنین میں قاری حاذق ناصری اور قاری صادق ناصری تھے ۔ نظامت مولانا شمیم اختر ندوی نے کی ۔
مولانا ادارہ دعوۃ السنہ ٹرسٹ ممبئی کے روح رواں مولانا شاہد ناصری الحنفی ، نائب صدر مولانا سید اعجاز احمد ملی ، مفتی محمد نافع عارفی ،مصر کے قونصل جنرل سید تبارک محمد ، مولانا ابو ظفر حسان ندوی ، بصیرت میڈیا گروپ کے چیرمین مولانا غفران ساجد قاسمی ،آمنا سامنا کے ایڈیٹر راشد عظیم ، مولانا عبدالقدوس شاکر حکیمی ، سہراب اعظمی ، قاری شہاب صدیقی ودیگر کافی ذمہ داران اس موقع پر موجود تھے۔
بھٹکل کے حافظ جعفر قاضیا کے اول مقام حاصل کرنے پر مجلس اصلاح و تنظیم بھٹکل کے صدر جناب مزمل قاضیا، جنرل سکریٹری محی الدین الطاف کھروری سمیت جامعہ اسلامیہ بھٹکل کے پرنسپال مولانا مقبول کوبٹے ندوی سمیت دیگر کافی اداروں کے ذمہ دارن نے انہیں مبارکباد پیش کی ہے۔
کیا آپ جانتے ہیں حافظ جعفر قاضیا کون ہیں ؟ اگر نہیں تو ذیل میں بھٹکل میں پیش کی گئی ان کی بہترین اور خوش الحان قرات کو سنئے۔ انہوں نے اس وڈیو میں مرحوم مولانا عبدالباری ندوی کی آواز کی نقل کرنے کی کامیاب کوشش کی ہے :