بھٹکل:17/ فروری (ایس اؤنیوز)اپریل ،مئی میں ہونےو الے ریاستی انتخابات کے لئے جنگ کا میدان تیار ہورہاہے، بی جےپی اپنے امیدواروں کی فہرست کو حتمی شکل میں دینےمیں مصروف ہے تو ادھر جے ڈی ایس کی طرف سے بھی تیاریاں جاری ہیں،

ذرائع نے خبر دی ہے کہ بی جے پی کے ریاستی صدر بی ایس یڈیورپا نے بھٹکل ودھان سبھا حلقہ سے بطور بی جے پی امیدوار  جے ڈی نائک کو تیار رہنے  کاحکم دیا ہے۔

اطلاع کے مطابق گذشتہ تین دنوں میں بنگلورو میں مقیم جے ڈی نائک کو بی جے پی کی ریاستی ہائی کمان کی طرف سے گرین سگنل دیا گیا ہے۔ جمعرات کو بنگلورو کے بی جےپی دفتر میں پارٹی پروگرام ختم کرنے کے بعد یڈیورپا نے جے ڈی نائک سے بات چیت کرتے ہوئے یہ یقین دہانی کرائی ہے کہ ان کو ہی ٹکٹ دی جائے گی۔ پارٹی جنرل سکریٹری شوبھا کرندلاجے نے بھی جے ڈی نائک کے حق میں ہی ہونے کی خبر ہے۔ حالانکہ یڈیورپا اور شوبھا کرندلاجے سابق وزیر شیوانند نائک کی حمایت میں تھے مگر انتخابات کی تیاری اور تشہیر بازی کی سرگرمی میں شیوانندنائک کمزور ہونے کو دیکھتےہوئے اپنا فیصلہ بدلنے کی بات کہی جارہی ہے۔ یڈیورپا اپنے گروہ میں شیوانند نائک کو باقی رکھتے ہوئے انتخابات کے موقع پر یا پھر شیوانندنائک کی صحت کےمطابق انہیں آئندہ دنوں میں ودھا ن پریشد یا کوئی اہم عہدہ سونپنے  جانے کی ذرائع نے خبر دی ہے۔ اس دوران بھٹکل ودھان سبھا حلقہ سے بی جےپی ٹکٹ کے مضبوط دعویدار سنیل بی نائک ، مرکزی وزیر اننت کمار ہیگڈے پر اعتماد کرتےہوئے پارٹی استحکام میں متحرک ہیں، ٹکٹ کے لئے امیدواروں کے درمیان رسہ کشی کے حالات کو کس موڑ پر لے جائے گی دیکھنا دلچسپ ہوگا۔ اس سلسلے میں سابق رکن اسمبلی جے ڈی نائک نے خیال ظاہر کرتے ہوئے کہاکہ یہ سچ ہے کہ میں بھی بھٹکل ودھان سبھا حلقہ سے بی جے پی ٹکٹ کا امیدوار ہوں اور مجھے یقین ہے کہ پارٹی ہائی کمان ایک اہل امیدوار کو منتخب کرے گی۔