بھٹکل 21/ نومبر (ایس او نیوز) یہاں کوالٹی ہوٹل کے سامنے نیشنل ہائی وے 66 پرہوئے ایک سڑک حادثے میں ایک نوجوان شدید زخمی ہوگیا، جسے بھٹکل سرکاری اسپتال میں ضروری طبی امداد کے بعد مینگلور اسپتال روانہ کیا گیا ہے۔حادثہ آج منگل شام قریب 7 بجے پیش آیا۔

  بتایا گیا ہے کہ کارگیدے کا رہنے والا  فضل الرحمن برماور(38) بائک پر سوار غالباً اپنے گھر جارہا تھا ،جبکہ لاری ہوناور سے مینگلور کی طرف جارہی تھی ، ہوٹل کے سامنے ہی دونوں کی آمنے سامنے سے  ٹکر ہوگئی۔ حادثے کے فوری بعد لاری ڈرائیور لاری کو چھوڑ کر موقع واردات سے فرار ہوگیا، جبکہ مقامی لوگوں نے فوری طور پر فضل الرحمن کو بھٹکل سرکاری اسپتال میں منتقل کرایا۔ اس دوران  پورا نیشنل ہائی وے قریب آدھے گھنٹے کے لئے بلاک ہوگیا تھا، بعد میں پولس نے موقع پر پہنچ کر ضروری کاروائیوں کے بعد ہائی وے کو سواریوں کے لئے کھول دیا۔

حادثے میں  فضل الرحمن کے سر اور چہرے پر شدید چوٹ لگی ہے، جس کو دیکھتے ہوئے اُسے فوری طور پر مینگلور لے جایا گیا ہے۔