مندر میں گوشت پھینکے جانے والے معاملے میں بی جے پی لیڈر کا نام لینے پربی جے پی میں کھلبلی؛ پی ایس آئی ریوتی کے خط کی مذمت
بھٹکل:30/اگست(ایس او نیوز) بھٹکل ٹائون پولس تھانہ کی معطل شدہ سب انسپکٹر ریوتی ریونکر نے ریاستی وزیر داخلہ کو لکھے گئے خط میں بھٹکل کے کوگتی علاقے کے مندر میں گوشت برآمد ہونے والے معاملے میں بی جے پی لیڈرکا نام لینے پربی جے پی میں کھلبلی مچ گئی ، جس پر فوری پریس کانفرنس کا انعقاد کرتے ہوئے کڑی مذمت کی گئی۔
منگل کی شام مقامی بی جے پی کی طر ف سے شہر کے نجی ہوٹل میں منعقدہ پریس کانفرنس میں مقامی صدر راجیش نائک نے کہاکہ قانونی انتظامات کے نفاذ میں ناکام ریوتی نے معاملے کو دوسرارخ دینے کی کوشش کی ہے۔ جب انہیں ملزموں کے متعلق جانکاری تھی تو ملزموں کو گرفتار کرنا تھا۔ انہوں نے کہا کہ اس تعلق سے پی ایس آئی ریوتی نے پارٹی کے کسی بھی عہدیدارکے دھیان میں نہ لاتے ہوئے بی جے پی پارٹی کی بے عزتی کی ہے۔ ریوتی کے بیان سے پارٹی کارکنان تشویش میں مبتلا ہیں۔ راجیش نائک نے بتایا کہ ایس آئی ریوتی اپنا ذہنی توازن کھو چکی ہیں، انہوں نے سب انسپکٹرپر ہتک عزت معاملہ درج کئے جانے کی بات کہی۔
پریس کانفرنس میں گنیش چترتھی کے موقع پر پولس کی طرف سے عائد کی جانے والی پابندیوں کی بھی مخالفت کی گئی۔ سکریٹری سبرائے دیواڑیگا، بھاسکر دئیمنے ، پرمیشور دیواڑیگا، کرشنانائک آسار کیری ، کسان بلسے ، دنیش نائک، سنیل نائک، ایشور دوڈمنے، وینکٹیش نائک مٹھلی، روی نائک جالی ، لکشمن نائک، موہن نائک، داس نائک تلگوڈ، سنتوش نائک ماولی، شنکر نائک، مادیو نائک، تلسی داس نائک وغیرہ موجود تھے۔