بھٹکل  :یکم اگست (ایس اؤ نیوز)تعلقہ کے بینگرے گرام پنچایت حدود میں کچرانکاسی مرکز تعمیر کی سخت مخالفت کرتےہوئے دیہی عوام نے بھٹکل اسسٹنٹ کمشنر کو میمورنڈم سونپتے ہوئے مطالبہ کیا کہ رہائشی علاقے میں کچرا نکاسی مرکز کی تعمیر نہ ہونے دیں۔

میمورنڈم میں کہاگیا ہے کہ ضلع انتظامیہ نے بھٹکل تعلقہ کے پنچایت آفیسران کو سرکلر بھیجتے ہوئے کہا ہے کہ بینگرے گرام پنچایت کے سروے نمبر 1125/2اے کی زمین پر بھٹکل تعلقہ کے سبھی گرام  پنچایتوں کا کچرا نکاسی مرکز تعمیر کریں۔کچرا نکاسی مرکز کی تعمیر سے  بینگرے  کے نواح میں بیماریوں کے پھیلنے کا خدشہ ہے ، اس کے علاوہ رہائشی اور زرعی سرگرمیوں پر بھی اس کی زد پڑے گی۔ بارش کے موسم میں یہاں سے بہنے والا پانی نالوں کے ذریعے کھیتوں، کنوؤں وغیرہ میں مل کر زراعت سمیت زندگی کے لئے ضروری کاموں میں رکاوٹ پیدا  کرنے کا خطرہ ہے۔ ان وجوہات کو سامنے رکھتے ہوئے کسی حال میں بھی متعلقہ زمین پر کچرانکاسی مرکز کی تعمیر کے لئے موقع نہ دینے کا مطالبہ میمورنڈم میں کیاگیا ہے۔ بھٹکل اسسٹنٹ کمشنر ساجد ملا نے میمورنڈم حاصل کیا۔ اس موقع پر بینگرے گرام پنچایت صدر وینکٹیا بھئیرو منے ، تعلقہ پنچایت ممبر وشنو دیواڑیگا، گرام پنچایت ممبران گنپتی بھئیرومنے ، ساتیا نائک، رامچندر نائک، پرمیا نائک، چندرشیکھر دیواڑیگا، راجیش ، روی وغیرہ موجود تھے۔