بھٹکل:18/اپریل (ایس او نیوز)بھٹکل ودھان سبھا حلقہ میں صاف شفاف انتخابات منعقد کرنےکے لئے ضروری اقدامات کئے گئے ہیں، حلقہ کے مختلف مقامات پر چک پوسٹوں کا قیام کرتےہوئے 5لاکھ سے زائدغیرقانونی نقد رقم ضبط کرلی گئی ہے۔ اپنے دفتر میں منعقدہ پریس کانفرنس میں بھٹکل اسسٹنٹ کمشنر سدیشور نےاس کی جانکاری دی ۔
پریس کانفرنس میں اے سی انتخابات کی تیاریوں کے متعلق پوری تفصیلات بتاتے ہوئے کہاکہ ہوناورکے گیرسوپا ، کاسرگوڈ، بھٹکل کے گورٹے ، سرپن کٹے ، کونٹوانے میں چک پوسٹ کا قیام کرتے ہوئے جانچ میں سرگرم ہے۔ ابھی تک گیر سوپا میں 4،40،000اور گورٹے چک پوسٹ پر 100377روپئے نقد ضبط کرلئے گئے ہیں۔ انہوں نے بتایا کہ 10لاکھ روپیوں سے زائد رقم ضبط ہوتی ہے تو متعلقہ رقم انکم ٹیکس محکمہ کے سپر د کی جاتی ہے۔ بھٹکل اور ہوناورتعلقہ جات میں علاحیدہ طورپر 13سیکٹر آفیسران کونامزد کرتے ہوئے انہیں خصوصی اختیارات دئیے گئے ہیں۔ بھٹکل3 اور ہوناور میں 3فلائنگ اسکواڈ بارباری اپنے فرائض کو انجام دے رہے ہیں۔ وڈیو گرافی، وڈیو دیکھنے کے لئے بھی الگ الگ ٹیمیں تشکیل دی گئی ہیں۔ انتخابات کے پیش نظر نگراں کار بھٹکل پہنچ چکے ہیں۔ 22اپریل کو عام نگراں کار وں کی آمد ہوگی۔
حلقہ میں پولنگ بوتھ اور رائے دہندگان کی تفصیل بتاتے ہوئے اے سی نے کہاکہ بھٹکل میں 140اور ہوناور میں 108پولنگ بوتھ ہیں۔ پولنگ بوتھ پر پینےکاپانی ، رفع حاجت سمیت بنیادی سہولیات کا انتظام کرنےکے لئے اقدامات اٹھائے گئے ہیں۔ جن بوتھس پر زائد ووٹر ہیں وہاں اضافی بوتھ کا قیام کئے جانےکی بات کہی۔
اے سی نے بتایا کہ بھٹکل ودھان سبھا حلقہ میں کل 212590ووٹرس ہیں۔ حالیہ ہوئی نئے ووٹرس اندراج مہم کے تحت اضافی طورپر 1380ووٹر شامل ہوئے ہیں۔ اس مرتبہ رائے دہندگان کو اپنا ووٹ تصدیق کرنے کےلئے وی وی پیاٹ نصب کئے گئے ہیں۔ خاتون افسر، خاتون عملہ پرمشتمل ایک مثالی پولنگ بوتھ کے قیام کرنےکی جانکاری دی ۔ اس موقع پر آئی اے ایس آفیسر آنند موجود تھے۔