بھٹکل:12؍نومبر (ایس او نیوز)امام الہند ،بھارت کے پہلے وزیر تعلیم مولانا ابوالکلام آزاد کے یوم پیدائش پر طلبا کو ان کی شخصیت سے متعارف کرانے اور وطن عزیز کی آزادی کے لئے ان کی طرف سے پیش کی گئی قربانیوں کو پیش کرنے کی غرض سے اسلامیہ اینگلو اردو ہائی اسکول بھٹکل میں مولانا آزاد لینگویج اینڈ لائبریری کلب کے زیر اہتمام 11نومبر 2018بروز اتوار کو ‘‘ یوم تعلیم ‘‘ منایاگیا ۔

جماعت ہشتم کے متعلم عبدالرحمن کی تلاوت کلام پاک سے جلسہ کا آغاز ہوا۔ اس کے بعد دہم جماعت کے طالب علم مشرف محی الدین نے ہدیہ نعت پیش کی ۔ اردو کے استا د نور محمد نے  سبھی کا استقبال کرتے ہوئے مہمان خصوصی کا تعارف پیش کیا۔ اس موقع پر اسکول کے طلبا نے مولاناآزاد کی شخصیت، قربانیاں، ان کی مجاہدانہ کاوشوں پر روشنی ڈالتےہوئے تقریریں کیں۔ جماعت ہشتم کے مفاز احمد ابن مبین ائیکری نے ’مولانا آزاد قومی یکجہتی کے علم بردار ‘۔محمد جواب ابن محمد جاوید ناگرمٹ نے ’مولانا آزاد کی شخصیت ‘۔ دہم جماعت دہم کے خبیب احمد ابن مولانا خواجہ معین الدین اکرمی نے ’مولانا آزاد کی ناقابل فراموش خدمات ‘ کے عنوانات پر تقریریں پیش کیں۔

محکمہ اقلیتی بہبود بھٹکل کے توسیعی آفیسر شمس الدین شیخ نے مہمان خصوصی کی حیثیت سے مولانا آزاد کی زندگی کے مختلف پہلوؤں پر روشنی ڈالتے ہوئے طلبا کو مولانا کی علمی و ادبی شخصیت کو اپنا کر ایک قائد کی طرح ترقی کرنےکی تلقین کی اور محکمہ اقلیتی فلاح وبہبودی کی طرف سے ملنے والی سہولیات کاذکر کرتے ہوئے اس سے استفادہ کرنےکی اپیل کی۔ اس موقع پر انہوں نے ایک کتابچہ کی رونمائی کی۔ انگریزی ادب کے استاد محی الدین ختالی نے طلبا سے خطاب کرتے ہوئے علم کے ساتھ ادب بھی حاصل کرنےاور نصابی کتابوں کے ساتھ دیگر ادبی کتابوں کے مطالعہ کی طرف توجہ دلائی ۔

ہائی اسکول کے صدر مدرس شبیر دفعدار نے صدارتی خطاب کرتے ہوئے کہاکہ طلبا علم و ادب کے ساتھ اخلاق پر بھی توجہ دینے اور مولانا آزاد جیسی شخصیت کے نقش قدم پر چلنے کی ترغیب دی۔ علم سائنس کے استاد عبدالرشید مرزانکر نے ملک کی آزادی کے موقع پر مولانا آزاد کو  درپیش مسائل و مشکلات اور اس کے حل کے لئے کی گئی کاوشوں کا ذکر کرتے ہوئے طلبا کی رہنمائی کی انہی کے شکریہ کے ساتھ جلسہ اختتام کو پہنچا۔ مولوی عبدالحفیظ ندوی نے نظامت کے فرائض انجام دئیے۔