بھٹکل انجمن ڈگری کالج اینڈ پی جی سنٹر کے زیراہتمام سرسید کی ادبی و تعلیمی خدمات پر کل ہند سمینار و مشاعر ہ
بھٹکل:9/ فروری (ایس اؤنیوز)انجمن آرٹس ، سائنس اینڈ کامرس کالج اینڈ پی جی سنٹر بھٹکل کے زیر اہتمام اور کرناٹک اردو اکیڈمی بنگلورو کے اشتراک سے انجمن کالج فنکشن ہال میں 11فروری صبح30-09بجے ’’سرسید کی ادبی وتعلیمی خدمات اور اس کی عصری معنویت ‘‘پر کل ہند سمینار کے انعقادکی جانکاری کالج پرنسپال پروفیسر مشتاق احمد شیخ نے پریس ریلیز کے ذریعے دی ہے۔
پریس ریلیز کے مطابق انجمن حامئی مسلمین بھٹکل کے نائب صدر سید عبدالرحمن باطنؔ افتتاحی اجلاس کی صدارت کریں گے تو کرناٹک اردو اکیڈمی بنگلورو کے چیرمن ڈاکٹر سید عبدالقدیر ناظم سرگرہ کے ہاتھوں سمینار کا افتتاح ہوگااور بہار،پٹنہ یونیورسٹی کے صدر شعبہ اردو ڈاکٹر جاوید حیات کلیدی خطبہ دیں گے۔اس کے فوری بعد مقالہ جات کی نشست ہوگی، جس میں کیرلا ،کالی سنسکرت یونیورسٹی کے کرشنا کے نکولن سمیت ممبئی ، کلبرگی ،بھدراوتی،بنگلورو سمیت ادبی و تعلیمی ماہرین اپنےمقالات جات پیش کریں گے۔ شعبہ اردو کے لکچرر پروفیسر عبدالرؤوف سونور سمینار کوآرڈینیٹرہونگے۔
شب00-09بجے انجمن اینگلو اردو ہائی اسکول گراؤنڈ میں کل ہند مشاعرہ منعقد ہوگا ، جس کی نظامت بنگلورو کے مشہور و معروف شاعر ریاض احمد خمار کریں گے تو صدارت کرناٹکا اردو اکیڈمی بنگلورو کے چیرمن ڈاکٹر سید عبدالقدیر ناظم سرگروہ کریں گے ۔ مشاعرے میں راجستھان سے یوسف رازؔ، سراج شولاپوری، اسلم بنارسی،مسرت پاشا راہیؔ سمیت مشہور شعراء کے علاوہ مقامی شعراء بھی اپنا کلام پیش کرنے کی اطلاع پریس ریلیز میں دی گئی ہے۔