بھٹکل:11؍جنوری (ایس او نیوز) پچھلے سوبرسوں سے انجمن حامئی مسلمین بھٹکل تعلیمی میدان میں سرگرم عمل رہتے ہوئے علوم و فنون کے دریا بہائےاور نہ صرف بھٹکل بلکہ پاس پڑوس علاقے کی عمومی جہالت کو کافور کرنے میں کامیاب ہوئی ہے۔ ان خیالات کا اظہار انجمن کی بانی میر معلمہ محترمہ رابعہ عثمان حسن جوباپو نےکیا۔
وہ یہاں انجمن حامئی مسلمین بھٹکل کے صدسالہ جشن کے تیسرے دن مستورات کے لئے مختص6جنوری بروز اتوار کو انجمن آباد میدان میں منعقدہ جلسہ میں صدارتی خطاب کررہی تھیں۔ محترمہ نے بالکل ابتداء میں لڑکیوں کی تعلیم کے لئے انجمن کی طرف سے کی گئی کاوشوں کاتذکرہ کرتے ہوئے تعلیمی سہولیات بہم پہنچانے میں انجمن کے خدمات کی ستائش کی۔
مہمان خصوصی فاطمہ مظفر نے طالبات سے خصوصی خطاب کرتے ہوئے کہاکہ بحیثیت عورت حضرت خدیجہ ؓ نے اللہ کے نبی ﷺ کی جس طرح مدد کی بالکل اسی طرح ہم مسلمان عورتوں کو بھی آگے بڑھنا چاہئے۔ اسی طرح خدادا صلاحیت کی مالک، تعلیم سمیت کئی ایک میدانوں کی ماہر ام المومنین حضرت عائشہ ؓ جیسی عظیم خواتین ہماری ماڈل ہونی چاہئے۔ ہمیں ان کی طرح ہر میدان میں ترقی کرتے ہوئے انسانیت کی خدمت کرنی چاہئے۔ موصوفہ نے طالبات کو خاص کر تلقین کی کہ وہ صحابیاتؓ کی سیرت کا مطالعہ کریں ان کی طرح اپنے آپ کی تربیت کرتے ہوئے ہماری آنے والی نسل کے لئے ایک نمونہ بننے کی بات کہی۔ انہوں نے کہاکہ تعلیم ایک چیلنج ہے، طالبات کو صرف بھٹکل کی حد تک نہیں رہنا ہے بلکہ تعلیم حاصل کرنے کے بعد اس کا فائدہ پورے ملک کو ہونا چاہئے۔محترمہ نسرین ظہیرنے اعزازی مہمان کے طورپر خطاب کرتے ہوئے کہاکہ ایک تعلیم یافتہ لڑکی، طالبہ نہ صرف اپنی بلکہ والدین، خاندان سمیت پورے ملک کی ترقی میں تعاون کرتی ہے اس کے ساتھ ساتھ وہ اپنے بچوں کے لئے ایک نمونہ بن کر ان کی بہتر تربیت کرتے ہوئے ملک کا بہترین شہری بنا سکتی ہے۔
انجمن الومنی ،بھٹکل سرکاری اسپتال کی میڈیکل آفیسر ڈاکٹر سویتا کامت نے خطاب کرتے ہوئے کہاکہ خود میں اورمیرے خاندان کے کئی افراد اسی انجمن کے تعلیم یافتہ ہیں ، کئی ایک انجمن کے اساتذہ ہیں جنہوں نے مجھے بہتر تعلیم دے کر آج اس مقام پر لا کھڑا کیا ہے جس کے لئے میں انجمن حامئی مسلمین بھٹکل کا شکریہ ادا کرتی ہوں۔ انہوں نے انجمن الومنی کو مستحکم کرتے ہوئے تعلیمی ادارے کو مزید ترقی کی راہوں پر لے جانے کی درخواست کی۔
جلسہ کا آغاز تلاوت قرآن سے ہوا جس کا اردو، انگریزی اور کنڑا ترجمہ پیش کیا گیا۔ اس کے بعد طالبات نے حمد، نعت اور ترانۂ انجمن پیش کرتے ہوئے جلسے کو خوبصورتی بخشی۔ انجمن صدسالہ جشن کی کنونیر برائے مستورات محترمہ سیما قاسمجی نے انجمن کے وزن اور مشن پر روشنی ڈالی تو کوآرڈنیٹر ،ڈگری کالج پرنسپال رئیسہ شیخ نے انجمن حامئی مسلمین کی تعلیمی خدمات کو پیش کیا۔ انجمن کالج آف ایجوکیشن کی پرنسپال ڈاکٹر زکیہ زرزری نے استقبال کرتے ہوئے مہمانوں کا تعارف پیش کیا۔ لکچرر مینوٹی بھٹ نے شکریہ اداکیا۔ ڈائس پر انجمن پی یوکالج فارویمن ڈاکٹر فرزانہ محتشم سمیت کئی ایک موجود تھے۔
جلسے میں طویل تدریسی خدمات انجام دینےو الی معلمات اور رینک ہولڈر طالبات کی شال پوشی کرتے ہوئے تہنیت کی گئی ۔ اس کے بعد طالبات کی طرف بہت ہی دلچسپ ثقافتی پروگرام پیش کئے گئے۔جلسے میں ہزارو ں خواتین شریک تھیں۔ اس موقع پر انجمن حامئی مسلمین بھٹکل کی طرف سے شرکاء کے لئے تواضع کا اہتمام کیاگیا تھا۔