بھٹکل 5/مارچ (ایس او نیوز)  انجمن حامئی مسلمین بھٹکل کے صد سالہ جشن کی تقریبات کے سلسلہ کی کڑی کے طور پر مورخہ  7/مارچ بروز  جمعرات  کو  انجمن کالج فور ویمن  (نزد شمس الدین سرکل) میں   خواتین کے لئے گیٹ ٹو گیدر کا شاندار پروگرام منعقد کیا گیا ہے    جس میں  خواتین  کے لئے ڈرامے سمیت  دلچسپ تفریحی پروگرام  پیش کئے جائیں گے۔ اس بات کی اطلاع انجمن صد سالہ جشن کمیٹی (خواتین) کی کیوینرمحترمہ سیما قاسمجی نے دی۔

اخبار نویسوں سے گفتگو کرتے ہوئے انہوں نے بتایا کہ انجمن کی تاریخ میں پہلی مرتبہ  انجمن پروفیشنل کالجس بالخصوص   AITM, B.Edاور   AIMCA کی طالبات  اس طرح کے دلچسپ کلچرل پروگرام پیش کررہی ہیں،  جس سے  خواتین بھرپور لطف اُٹھاسکتی ہیں۔

پروگرام کی پہلی نشست کا آغاز صبح 9:30 بجے ہوگا جس میں مہمانان کے خطابات سمیت  یونیورسٹی رینک حاصل کرنے والی ہونہار طالبات کی تہنیت کی جائے گی۔ پروگرام کی  دوسری نشست دوپہر ٹھیک دو بجے شروع ہوگی  جس  میں دلچسپ ڈرامے،  مکالمے اور دیگر کلچرل  پروگرام پیش کئے جائیں گے۔

پروگرام میں مہمان خصوصی کے طور پرماہر تعلیم  اور بنگلور کی معروف ایم ایس رامیا یونیورسٹی کی این ایس چند ن شری کو مدعو کیا گیا ہے، شمس کلینک بھٹکل کی ماہر ڈاکٹر  شمس نور، اعزازی مہمان کے طور پر تشریف فرما ہوں گی جبکہمحترمہ سیما قاسمجی پروگرام کی صدارت کریں گی۔

انجمن پروفیشنل کالج کی انتظامیہ، اسٹاف اور طالبات نے بھٹکل اور اطراف کے علاقوں کی   تمام خواتین سے درخواست کی ہے کہ وہ کثیر تعداد میں اس پروگرام میں شریک ہوکر پروگرام کو کامیاب بنائیں۔