بھٹکل:16/جون (ایس اؤنیوز)ہیبلے گرام پنچایت حدود کے جامعہ آباد وارڈ میں کوئی بنیادی سہولیات نہیں ہونےسے ناراض علاقہ کے عوام نے الجامعۃ اسپورٹس سنٹر بھٹکل کے ذریعے ہیبلے گرام پنچایت کے صدر اور پی ڈی اؤ کو میمورنڈم سونپتے ہوئے سہولیات فراہم کرنے کا مطالبہ کیا۔
پنچایت صدر کو سونپے گئے میمورنڈم میں تحریر کیا گیا ہے کہ ہیبلے گرام پنچایت حدود کے جامعہ آباد روڈ میں کوئی بنیادی سہولیات نہیں ہیں، سڑکیں تالاب ہوگئی ہیں، سڑکوں کی درستی و مرمت کو برسوں گزر چکے ہیں۔ اندرونی نالیوں میں کچرا بھر کرزمانہ ہوگیا ہے صفائی کا دور دور تک پتہ نہیں ، نہ گھر گھر کچرا جمع کیا جاتاہے نہ سڑک کناروں کی لائٹ روشنی دیتی ہیں، اکثر مقامات پر پینے کے پانی کی سپلائی متاثر ہوئی ہے، یہ وارڈ کے مسائل ہیں جنہیں پنچایت فوری توجہ دے کر حل کرنےکی طرف اقدام کرنےکی سنٹر کی طرف سے مانگ کی گئی ہے۔ جامعہ آباد سے مسجد کو جانے والی روڈ اور جالی سے جوڑنے والی سڑک پر ڈالی گئی مٹی سے سڑک پوری کیچڑ سے بھر گئی ہے، راہ گیروں کا چلنا پھرنا دشوار ہوگیا ہے ۔اسی طرح جامعہ آباد رکشا اسٹانڈ پر ایک ہمپ اور ستیش شٹی کی دکان کے سامنے ایک ہمپ تعمیر کرنےکی بھی مانگ کی گئی ۔میمورنڈم میں وارڈ کے جن مسائل کو پیش کیا گیا ہے پنچایت جتنی جلد ہوسکے اس کے لئے امداد منظور کرکے مسائل کو حل کرنے کا مطالبہ کیا گیا ہے۔ اس موقع پر صدر محمد عرفان کیمپا، سکریٹری محمد سفیان دڈی، ممبران محمد سلیم علی جی ، محمد رفاقت، محمد سہیل وغیرہ موجود تھے۔