سڑک کنارے کے اتی کرم داروں میں معاوضہ کی تقسیم : پہلی قسط میں 4کروڑروپیوں سے زائد رقم منظور کئے جانے کا بھٹکل رکن اسمبلی کا دعویٰ
بھٹکل:17/ اکتوبر (ایس اؤنیوز) ہوناور کے کاسرگوڈ سے بھٹکل کے شرور تک قومی شاہراہ کے کناروں پر موجود اتی کرم داروں میں چار کروڑ روپئے بطور ہمدردی معاوضہ تقسیم کیا جارہاہے، اس طرح آتی کرم داروں میں معاوضہ تقسیم کرنے کا کام پورے ملک میں پہلی بار ہورہا ہے، یہ بات بھٹکل رکن اسمبلی منکال وئیدیا نے بتائی۔
وہ یہاں منگل کی شام تعلقہ پنچایت ہال میں مستفیدین میں حکم نامہ کی نقل تقسیم کرنےکے بعد خطاب کررہے تھے۔ انہوں نےکہاکہ قومی شاہراہ کے آس پاس موجود اتی کرم داروںکو نکال باہر کرنا سرکار کی مجبوری ہے، ہمارے پاس اُنہیں وہاں سے ہٹانے کے علاوہ کوئی دوسرا راستہ نہیں ہے، منکال وئیدیا نے دعویٰ کیا کہ انہوں نے معاوضہ دلانے کو لے کر اپنی بساط بھر سے بھی زائد کوشش کی ہے اور اتی کرم داروں کےساتھ انصاف کرنےکی کوشش کی ہوں۔ان کے مطابق ریاست کے وزیرا علیٰ، ضلع نگراں کاروزیر، اترکنڑا ضلع انتظامیہ نے ہمیں ہر طرح کا تعاون دیا ہے، جس سے یہ کامیابی حاصل ہوئی ہے۔
منکال وئیدیا کے مطابق ہم نے بھٹکل اور ہوناور علاقہ کے لئے 10کروڑ روپیوں کامطالبہ کیا تھا پہلی قسط کے طورپر 4،11،60،495روپئے کا معاوضہ منظور ہواہے، جس میں سرکاری اور فاریسٹ زمین کے اتی کرم دار بھی شامل ہیں۔ ہرایک اتی کرم دار کو 5000ہزار روپئے سے لے کر 30لاکھ روپئے تک کامعاوضہ منظور کیا گیا ہے۔ انہوں نے مزید کہا کہ ابھی بہت سارے لوگوں کو معاوضہ ادا کرنا باقی ہے۔ انہوں نے بقیہ لوگوں سے مناسب دستاویزات کے ساتھ افسران سے رابطہ کرنے کی اپیل کی اور کہا کہ دستاویزات کی پیشی کے بعد انہیں بھی معاوضہ دلانےکی بھرپور کوشش کی جائے گی۔اس موقع پر بھٹکل اسسٹنٹ کمشنر ایم این منجوناتھ، تحصیلدار وی این باڈکر، تعلقہ پنچایت افسر سی ٹی نائک موجود تھے۔