مینگلور میں ایل آئی سی آفیسر کی شکل میں فون کے ذریعے فریب دینے کی ناکام کوشش
منگلورو 21؍فروری(ایس او نیوز)عام لوگوں کوٹیلی فون ،انٹرنیٹ اور سوشیل میڈیاکے ذریعے لوٹنے کے واقعات روزانہ کسی نہ کسی مقام پر واقع ہوتے ہیں۔ ہزار بار لوگوں کوسمجھانے اور اپنے بینک اکاؤنٹ کی تفصیلات کسی بھی طرح فون پر یا انٹرنیٹ اور سوشیل میڈیا کے ذریعے کسی کو بھی نہ دینے کی تاکید کیے جانے کے باوجود لوگوں کے لٹنے کا سلسلہ بند نہیں ہوتا۔ اور لٹیرے بھی روز نئے ہتھکنڈے استعمال کرتے ہوئے لوگوں کو چکرانے میں کامیاب ہوجاتے ہیں۔
تازہ واقعہ منگلورو کا ہے جہاں پر ایک شخص کی حاضر دماغی نے اسے لُٹنے سے بچالیا۔ کہا جاتاہے کہ کاوور علاقے کے ایک شخص کوٹیلی نمبر 9717616353 سے ایک کال موصول ہوئی جس میں کہا گیا کہ لائف انشورنس کارپوریشن کے دفتر سے یہ کال کی جارہی ہے۔ اس کی انشورنس پالیسی ختم ہوگئی ہے۔چونکہ تم نے اپنے ایجنٹ سے رابطہ قائم نہیں کیا ہے اس لئے دفتر سے کال کی جارہی ہے۔ تم شام تک اپنے بینک اکاونٹ، پان کارڈ اور اے ٹی ایم وغیر ہ کی تفصیلات تیار رکھنا ۔ جب ہم شام کو کال کریں گے تو وہ تفصیلات دینا۔ تب تمہاری پالیسی کی رقم تمہارے اکاؤنٹ میں جمع کردی جائے گی۔ بصورت دیگر وہ رقم کارپوریشن کی طرف سے ضبط کرلی جائے گی۔
مذکورہ شخص کے دماغ میں کچھ شکوک ابھرے تو اس نے ذاتی طور پر انشورنس کارپوریشن کے دفتر پہنچ کر اس معاملے میں دریافت کیا۔ تووہاں پر موجود افسران نے اس قسم کی کسی کال سے لاعلمی ظاہر کرتے ہوئے بتایا کہ اس کی انشورنس پالیسی ابھی برقرار ہے ۔ لہٰذا کال کرنے والوں کو وہ کسی بھی قسم کی معلومات فراہم نہ کرے۔ وہ شخص مطمئن ہوکر دفتر سے لوٹ آیا ۔ اس کے بعد اسی نمبر سے اس کو مسلسل فون کال موصول ہوتے رہے مگر اس نے ایک بھی کال ریسیو نہیں کی اور لٹیرے اپنا سا منھ لے کر رہ گئے۔
