نلمنگلا کے قریب کے ایس آر ٹی سی بس شعلہ پوش،ایک خاتون کی موت ، ایک کی حالت نازک، 30مسافر بچ گئے
بنگلورو،21؍فروری(ایس او نیوز) چکمگلور سے بنگلور کی طرف آرہی ایک کے ایس آر ٹی سی بس اچانک شعلہ پوش ہوگئی ، جس کے نتیجہ میں بس میں سوار خاتون کی موت ہوگئی اور دیگر چند زخمی ہوگئے، جن میں سے ایک کی حالت نازک بتائی گئی ہے۔ یہ واقعہ قومی شاہراہ نمبر 4 پر کل آدھی رات کے بعد پیش آیا۔حادثہ میں ہلاک خاتون کی شناخت50سالہ بھاگیما کی حیثیت سے کی گئی ہے۔تاہم اس واقعہ میں 30 مسافر بحفاظت بچ گئے ۔یہ بس چکمگلور سے بنگلور آ رہی تھی۔ اس دوران دو مسافروں کو معمولی چوٹیں آئیں جنہیں اسپتال میں داخل کر ایا گیا ہے ۔وزیر ٹرانسپورٹ رام لنگا ریڈی نے اس واقعہ پر رنج وغم کا کرتے ہوئے کہا کہ عورت کے اہل خانہ کو تین لاکھ روپے کا معاوضہ دیا جائے گا۔انہوں نے بتایا کہ آگ لگنے کے اسباب کا پتہ نہیں چل سکا ہے، اس کے لگنے کی اصل وجوہات کا پتہ لگانے کیلئے تفتیش کرائی جائے گی۔کے ایس آر ٹی سی کے منیجنگ ڈائرکٹر راجندر کمار کھتریا نے بتایا کہ پہلے سمجھا جا رہا تھا کہ بس کے انجن میں شارٹ سرکٹ کی وجہ سے آگ لگی ہوگی، لیکن بعد میں پتہ چلا کہ کچھ آتش گیر مادہ تھا جس کے آگ پکڑنے کی وجہ سے یہ واقعہ رونما ہوا۔ معاملہ کی تفتیش کے لئے فارنسک ماہرین کی مدد لی جا رہی ہے ۔اس حادثہ میں زخمی ایک اور خاتون ممتا 35 سالہ کا تعلق ہاسن کے میر پور سے ہے۔اس کا لڑکا یشس بھی زخمیوں میں شامل ہے، لیکن اسے معمولی چوٹیں آئی ہیں، دونوں کو نلمنگلا کی میاگنس اسپتال میں داخل کرایا گیا ہے۔ بتایاجاتاہے کہ اسے حادثہ کے فوری بعد سرکاری اسپتال لے جایا گیا جہاں علاج میں پیش رفت نہ ہونے کے سبب بیہوشی کی حالت میں نجی اسپتال پہنچایا گیا۔ بتایاجاتاہے کہ بس کے عقبی حصہ میں آگ لگتے ہی آگے بیٹھے مسافروں نے چیخ وپکار کی اور فوراً کودپڑے ،آخر میں بھاگیما ، ممتا اور یشس پھنس گئے۔بس سے کودنے والے مسافروں نے یشس کو بچالیا لیکن بھاگیما کی موت ہوگئی اور ممتا بری طرح جھلس گئی۔ بس کے انجن میں آگ لگنے کے سبب یہ حادثہ رونما ہوا۔ محکمۂ ٹرانسپورٹ کے افسران اس معاملے کی جانچ میں لگے ہوئے ہیں۔