صرف اعلان سے کوئی شہر اسمارٹ سٹی نہیں بن جاتا: وینکیا نائیڈو

Source: S.O. News Service | By Shahid Mukhtesar | Published on 10th October 2018, 12:22 AM | ریاستی خبریں |

بنگلورو،9؍اکتوبر(ایس او نیوز) نائب صدر جمہوریہ ایم وینکیا نائیڈو نے کہا ہے کہ اسکولوں میں تعلیم کے ساتھ طلبا کو اسکواؤڈس ، گائیڈس اور این سی سی تربیت سے آراستہ کرنا لازمی قرار دیا جانا چاہئے۔ آج شہر میں بھارت اسکواؤڈس اینڈ گائیڈس اور بی بی ایم پی کی طرف سے مشترکہ طور پر منعقدہ دین دیال نائیڈو صد سالہ تقریبات سے خطاب کرتے ہوئے انہوں نے کہاکہ دسپلن لانے کے لئے اس طرح کی تربیت طلبا کو پہلے سے زیادہ ضروری ہوچکی ہے۔ انہوں نے کہاکہ موجودہ تعلیمی نظام میں سائنس کے شعبے کی ترقی ، معاشی ترقی کی رفتار اور دیگر تمام امور کا احاطہ کیا گیا ہے، لیکن بدقسمتی سے ملک کی گنگا جمنی تہذیب ،اخلاقی اقدار اور بھائی چارگی کے موضوعات نصاب کے حصے میں بہت کم ہیں۔ انہوں نے کہاکہ اسکواؤڈس اینڈ گائیڈس کی تربیت سے طلبا میں ڈسپلن ، اخلاقی اقدار وغیرہ کو بڑھانے کی ضرورت ہے۔ عوامی نمائندوں کے انتخاب کے معیار پر سوالیہ نشان لگاتے ہوئے نائب صدر نے کہاکہ ایسے عوامی نمائندوں کا انتخاب ہی کسی بھی معاشرے کو ترقی کی جانب لے جاسکتا ہے، جن میں ترقی کو اپنانے کی صلاحیت ، ڈسپلن اور عزم موجود ہو۔ انہوں نے کہاکہ کسی منتخب نمائندے کا انتخاب اگر اس کے پاس دستیاب دولت اور اس کے مجرمانہ ریکارڈ کی بنیاد پر اگر کیا جاتاہے تو عوامی زندگی سے اخلاق کا دیوالیہ نکل جائے گا۔ ملک کی ترقی انہیں لوگوں کی قیادت میں ممکن ہے جو اخلاق کی پاسداری اور ملک کے تئیں اپنی ذمہ داریوں کا احساس رکھتے ہوں۔ ان لوگوں سے ملک کی ترقی کی توقع فضول ہے جو اپنی دولت کے سہارے اقتدار تک پہنچتے ہیں۔ جدوجہد کے پس منظر والے اگر اقتدار پر فائز رہے تو وہ ترقی کے لئے بھی جدوجہد کریں گے۔ ملک بھر میں وقتاً فوقتاً رونما ہونے والی موسمی تبدیلیوں کے متعلق وینکیا نائیڈو نے کہاکہ بڑے بڑے شہروں میں تالابوں ، نالوں ، راستوں وغیرہ پر غیر قانونی قبضے کرلئے گئے ہیں جس کی وجہ سے ماحولیات پر بہت برا اثر مرتب ہو رہاہے۔کیرلا اور کورگ میں سیلاب اسی ماحولیاتی عدم توازن کا نتیجہ ہوسکتا ہے۔ انہوں نے کہاکہ شہر بنگلور میں آلودگی کافی بڑھتی جارہی ہے۔ مرکزی یا ریاستی حکومتوں کی طرف سے صرف شہروں کو اسمارٹ سٹی قرار دئے جانے سے یہ اسمارٹ نہیں ہوجاتیں بلکہ ان شہروں کو اسمارٹ بنانے کے لئے حکومت کے عملی منصوبوں کے ساتھ عوامی تعاون سے ترقیاتی منصوبوں کو آگے بڑھانے کی بھی ضرورت ہے۔ اس موقع پر انہوں نے کرناٹک میں اسکواؤڈس اینڈ گائیڈس کی تحریک کو مضبوط کرنے کے لئے سابق وزیر پی جی آر سندھیا کی خدمات کو سراہا۔ گورنر واجو بھائی والا نے بھی اس موقع پر اپنے خیالات کا اظہار کیا اور کہاکہ شہر بنگلور کے عالمی معیار کے انفرااسٹرکچر کو اور مضبوط کرنے کی ضرورت ہے۔ تقریب میں ریاستی وزراء یوٹی قادر ، سارا مہیش اور دیگر موجود رہے۔ یوٹی قادر جو خود بھی ایک اسکاؤڈ ہیں وہ تقریب میں باضابطہ اسکاؤڈ کے یونیفارم میں شریک ہوئے۔

ایک نظر اس پر بھی

انتخابات تک ودھان سودھا کو تالالگادیا جائے، ضمنی انتخابات کی طرف حکومت کی مکمل توجہ سے یڈیورپا ناراض

سابق وزیراعلیٰ اور ریاستی بی جے پی صدر بی ایس یڈیورپا نے پانچ حلقوں کے ضمنی ا نتخابات کے لئے وزراء اور حکمران اتحاد کے اراکین اسمبلی کو مکمل طور پر انتخابی مہم میں جھونک دئے جانے پر سخت اعتراض کرتے ہوئے کہا ہے کہ جب تک ضمنی انتخابات نہیں ہوجاتے بہتر ہے کہ وزیراعلیٰ کمار سوامی ...

کورگ ضلع کی از سر نوتعمیر کے لئے خصوصی اتھارٹی جلد: کمار سوامی 

وزیر اعلیٰ ایچ ڈی کمار سوامی نے اعلان کیا ہے کہ پچھلے ماہ طوفانی بارش ، سیلاب اور زمین کھسکنے کے واقعات سے بدحال کورگ ضلع میں باز آباد کاری اور از سر نو تعمیر کے لئے ایک مخصوص اتھارٹی کا قیام عمل میں آئے گا جس کی قیادت وہ خود کریں گے۔