بنگلورو،29؍مئی (ایس او نیوز) مرکزی حکومت نے مویشی بازاروں میں ذبح خانوں کے لئے گائے اور اس کی نسل کے دیگرجانور فروخت کرنے پر پابندی کا جو نوٹی فکیشن جاری کیا ہے ، اس کے خلاف کرناٹکا حکومت سپریم کورٹ کا دروازہ کھٹکھٹائے گی۔

اس بات کا اشارہ دیتے ہوئے ریاستی وزیر برائے مویشی پالن اور سیری کلچر کے وزیر اے منجو نے کہا ہے کہ مرکزی حکومت کی طرف سے جاری کردہ یہ قانون کسان مخالف ہے۔ اور1964 کے تحفظ مویشی اور گؤ کشی مخالف قانون سے بالکل جداگانہ ہے۔اس کے علاوہ نوٹی فکیشن سے پہلے مرکزی حکومت نے کسی بھی ریاستی حکومت او ر کسانوں سے مشورہ نہیں کیا ہے۔ اس لئے حکومت کرناٹکا کی طرف سے مرکز سے اپیل کی جائے گی کہ وہ اس قانون کو واپس لے۔ اگر مرکزی حکومت ہماری اپیل کو نہیں مانتی تو پھر ہم اس کے خلاف قانونی جنگ شروع کریں گے اور سپریم کورٹ کا دروازہ کھٹکھٹائیں گے۔

مسٹر منجو نے یہ بھی کہا کہ وہ وزیر اعلیٰ سدارامیا سے اس مسئلے کو اسمبلی میں پیش کرنے کی درخواست کریں گے تاکہ اس قانون کے منفی اور مثبت پہلوؤں پر بحث کی جا سکے۔