بنگلورو سلسلہ وار بم دھماکوں کا ملزم گرفتار
بنگلورو، 23 اکتوبر(یو این آئی) بنگلورو شہر میں دس سال پہلے سلسلہ وار بم دھماکوں کے ملزم سلیم مموٹی کو پولیس نے گرفتار کرکے ایک بڑی کامیابی حاصل کی ہے ۔ملزم مموٹی گذشتہ دس سالوں سے مفرور تھا۔ 25جولائی 2008 کو ہوئے سلسلہ وار بم دھماکوں میں ایک خاتون کی موت ہوگئی تھی اور کئی دیگر زخمی ہوگئے تھے ۔
پولیس نے منگل کو بتایا کہ مموٹی کے کیرل میں چھپے ہونے کی اطلاع ملنے پر بنگلوروں پولیس کی کرائم برانچ نے کیرل کے کنور ضلع کے پیریملان میں واقع اس کی رہائش گاہ سے اسے گرفتار کیا۔ وہ ان دھماکوں کا بیسواں ملزم ہے ۔اس معاملے میں کرائم برانچ نے بیس لوگوں کے خلاف ایف آئی آر درج کرائی تھی ۔ ان ملزمین میں پی ڈی پی کا ایک رہنما عبدالناصر مدنی بھی شامل ہیں۔ تمام ملزمین کو سنٹرل جیل پرپنا اگرہارا میں رکھا گیا ہے ۔