بنگلورو:15؍جنوری(ایس اونیوز) ہرسال سنکرانتی تہوار کے موقع پر چترکلا پریشد کے احاطہ اور کمار کروپا روڈ پر منعقد کئے جانے والے چتراسنتے نامی مصوری کے نمونوں کی نمائش وفروخت کا صبح وزیراعلیٰ سدارامیا کے ہاتھوں افتتاح عمل میں آیا۔ گزشتہ برسوں کے مقابلہ اس مرتبہ ہندوستان کے علاوہ بیرونی ممالک سے بھی 3؍ہزار سے زائد آرٹسٹوں مصور اور کارٹونسٹس نے اس میلہ میں شرکت کی۔ بڑی تعداد میں لوگوں نے یہاں اپنی پسند کے آرٹ کے نمونے خریدنے میں دلچسپی دکھائی۔ لوگوں کی بھیڑ اس قدر زیادہ تھی کہ آج کمار کروپا روڈ کو ٹریفک کے لئے بند رکھاگیا تھا۔ اس آرٹ کی نمائش میں آرٹ سے جڑے ہر شعبہ کے مصوری اور کارٹونسٹس کے نمونے نمائش اور فروخت کے لئے رکھے گئے تھے۔ نمائش میں بچوں اور بڑوں نے اپنے اپنے ہنر کو کینواس پرجس انداز میں پیش کیاتھا۔ اس کی ہرکوئی ستائش کررہاہے۔ نمائش میں ماڈرن آرٹ پینل، سیاسی، برش اور ہاتھ کی انگلیوں سے پینٹ کئے گئے نمونے ہرجگہ نظر آرہے تھے۔ اس نمائش میں ہاتھوں سے معذور ایک آرٹسٹ نے اپنے منہ سے برش پکڑکر جو پنٹنگ کی تھی اس کی ہرکوئی ستائش کررہاتھا۔ کیرلا ریاست کتور کی ایک اور معذور آرٹسٹ سنیتا گزشتہ 10؍برسوں سے مصوری کررہی ہے۔ یہ عورت منہ سے برش تھام کر پنٹنگ کرتی ہے۔ سوئٹزرلینڈ کے ایم ایم ایچ ڈی اے آرٹ سنٹر سے یہ لڑکی جڑی ہوئی ہے۔  اس نے نمائش میں کئی گریٹنگ کارڈس تیار کئے گئے جنہیں دیکھ کر وزیراعلیٰ سدارامیا نے بھی اس کی خوب ستائش کی۔