بینگلورو: بی بی ایم پی حدود میں کوپن کے ذریعہ راشن کی فراہمی: یوٹی قادر
بنگلورو۔22جولائی(ایس او نیوز) ریاستی وزیر برائے شہری رسد وخوراک یوٹی قادر نے آج بتایاکہ اگلے ماہ سے بی بی ایم پی حدود میں راشن کی فراہمی کیلئے کوپن نظام رائج کیا جائے گا۔ جس کے بعد تین ماہ کے عرصہ میں راشن کی فراہمی کوپن کے ذریعہ ہی کی جائے گی۔ آج جکور سے قریب واقع مہاتما گاندھی رورل اینرجی پروگرام انسٹی ٹیوٹ میں سیٹالائٹ کی بنیاد پر ریاست بھر کے راشن ڈپو مالکان سے بات چیت کے دوران انہوں نے بتایا کہ آدھار کارڈ سے جڑے راشن کارڈ ہولڈرس کو موبائل کے ذریعہ کوپن فراہم کرتے ہوئے ستمبر سے راشن فراہم کیا جائے گا۔ اب تک کوپن حاصل نہ کرنے والے افراد کیلئے پنچایت صدور نے کوپن فراہم کرنے کیلئے اقدامات کئے ہیں۔ جن افراد کے پاس آدھار کارڈ موجود ہے وہ لوگ موبائل کے ذریعہ 1614 پر ڈائل کرتے ہوئے رجسٹر کراسکتے ہیں۔ جس کے بعد انہیں کوپن نمبر فراہم کیا جائے گا۔ انہوں نے راشن ڈپو مالکان کو ہدایت دی کہ وہ راشن کارڈ کو آدھار سے جوڑنے عوام کا تعاون کریں۔ کوپن حاصل کرنے والے افراد اپنے قریبی کسی بھی ڈپو سے راشن حاصل کرسکتے ہیں۔ جناب قادر نے بتایاکہ حکومت چاہتی ہے کہ ہر ایک راشن کارڈ ہولڈر کو مقررہ مقدار میں اناج فراہم کیا جائے ، جس کیلئے راشن ڈپو مالکان کو دیانتداری کا مظاہرہ کرنا چاہئے۔ انہوں نے بتایاکہ شہری علاقوں میں 800 کارڈوںدیہی علاقوں میں 500اور جنگلاتی علاقوں میں 100کارڈوں کیلئے ایک راشن ڈپو مقرر کیا گیا ہے۔ اگر افزود کارڈ موجود ہوں تو قریبی ڈپوز کو منتقل کئے جائیں گے۔ آئندہ سے راست طور پر گودام سے راشن ڈپو کو راشن فراہم کرنے کیلئے اقدامات کئے گئے ہیں اور حکومت نے راشن ڈپو مالکان کے منافع کی حد میں اضافہ کا فیصلہ لیا ہے، جس کے تحت فی کنٹل 50 روپیوں سے 100 روپے کیا گیا ہے۔ ابتدائی مراحل میں انہیں 90 روپے فراہم کئے جائیں گے، بقیہ دس روپے آئندہ دنوں میں فراہم کئے جائیں گے۔ وزیر موصوف نے راشن ڈپو مالکان کو ہدایت دی کہ ڈپو میں موجود اناج کی مقدار سے متعلق تفصیلات نوٹس بورڈ پر چسپاں کریں بصورت دیگر سخت کارروائی کی جائے گی۔ اس موقع پر ابتدا ءمیں وزیراعلیٰ کا پیغام پیش کیا گیا۔ محکمہ¿ شہری رسد وخوراک کے پرنسپل سکریٹری ہرش گپتا اور دیگر موجود تھے۔