بنگلورو،7؍اکتوبر(ایس او نیوز) شہر کے پولیس کمشنر ٹی سنیل کمار نے کہاکہ شہر بنگلور خواتین واطفال کیلئے محفوظ ترین شہر ہے۔آنے والے دنوں میں خواتین واطفال کیلئے اس شہر کو اور بھی زیادہ محفوظ بنانے کیلئے پولیس کی طرف سے ضروری قدم اٹھائے جائیں گے۔آج پولیس کمشنر کے دفتر میں تحفظ خواتین مہم سے خطاب کرتے ہوئے مسٹر سنیل کمار نے کہاکہ بی پیاک تنظیم کے ساتھ یہ مہم چلائی جائے گی اور اس مہم کے دوران تحفظ خواتین واطفال کے متعلق خصوصی بیداری عام کی جائے گی۔ انہوں نے کہا کہ آنے والے دنوں میں خواتین کے تحفظ کیلئے جو گلابی ہوئسلا گاڑیاں شہر میں متعین کی گئی ہیں ان کی نگرانی بھی خواتین کے سپرد کی جائے گی اور ان گاڑیوں کو چلانے کیلئے خاتون ڈرائیوروں کا تقرر کیا جائے گا۔اس سلسلے کی پہلی کڑی کے طور پردو گلابی ہوئسلاگاڑیوں کیلئے خاتون ڈرائیوروں کے تقرر کا اعلان کیا گیا۔انہوں نے کہاکہ جیسے جیسے محکمۂ پولیس میں کام کرنے والی خواتین کوڈرائیونگ لائسنس ملتا رہے گا، انہیں گلابی ہوئسلاگاڑیوں میں تعینات کیا جائے گا۔ انہوں نے بتایاکہ محکمۂ پولیس میں پہلے خواتین کیلئے دس فیصد اسامیاں ریزرو تھیں انہیں بڑھا کر 20 فیصد کیاگیا ہے، آنے والے دنوں میں بنگلور پولیس فورس میں خواتین کی پلاٹونس میں اضافہ کیا جائے گا۔ ڈی سی پی ویسٹ مالنی کرشنا مورتی نے اس موقع پر پولیس تھانوں میں خواتین کی طرف سے آنے والی شکایات پر فوری کارروائی کرنے عملے کو ہدایت دی اور کہا کہ خواتین پر مظالم کی روک تھام کیلئے شہر بھر میں سی سی ٹی وی کیمروں کا جال بچھایا گیا ہے اس کا استعمال کیا جائے گا۔ اس کے ساتھ ہی انہوں نے کہاکہ شہر کی ان سڑکوں پر جہاں روشنی کا انتظام نہیں ہے وہاں روشنی کا انتظام کرنے بی بی ایم پی سے گذارش کی جائے گی۔