بنگلورو :حفاظتی انتظامات کے بارے میں والدین کو اسکولوں کی آگاہی
بنگلورو 15/ستمبر (ایس اؤنیوز)حالیہ دنوں میں اسکولوں میں بچوں کی سکیورٹی حفاظت سے متعلق جو واقعات پیش آرہے ہیں اس سے ایک بڑا سوال کھڑا ہوگیا ہے ۔ بہت سارے اسکول بچوں کے ماں باپ کو اس کے متعلق یقین دلا رہے ہیں کہ اس کے لئے ان کا کیا اقدام ہے۔ جئے نگر کے ایک اسکول کی ایک طالبہ کی ماں رنجیتا پر شانت نے بتایا کہ انہیں ایک سرکیولر بھیجاگیا ہے جس میں بچوں کی سکیورٹی اور حفاظت کے لئے اسکول نے جو قدم اُٹھائے ہیں اُس میں ان سے اس کی رائے طلب کی گئی ہے۔ اس سے ایک قدم آگے ایک اور اسکول والوں نے بچوں کے ماں باپ کو اسکول آنے کی دعوت دی ہے تاکہ اُن کو سکیورٹی اور حفاظت کے بارے میں معلومات کراسکیں۔ شہر اور شہر کے مضافات میں اسکول بچوں کی سکیورٹی اور حفاظت میں کمی سے متعلق ایسے بہت سارے واقعات پیش آئے جنہیں درج کیاگیا ہے۔ جب ایسے واقعات پیش آتے ہیں تو پہلے ماں باپ اس اسکول کے خلاف ہوجاتے ہیں اس کو ذہن میں رکھ کر ، جنوبی بنگلور کے ایک بڑے اسکول مینجمنٹ کے نمائندہ نے بتایا کہ انہوں نے بچوں کے والدین کو مقررہ دنوں میں اسکول آنے کی دعوت دی ہے جس سے ان کو اسکول کی سکیورٹی کے بارے میں معلومات فراہم کی جائیں گی۔ اس کو سراہتے ہوئے کرناٹکا اسوسیٹیڈ مینجمنٹ آف پرائمری اور سکینڈری اسکولیں کے جنرل سکریٹری ڈی ششی کمار نے بتایا کہ یہ اسکولوں کا ذمہ دارانہ اقدام ہے۔ بچوں کے داخلے کے وقت کوئی والدین اس کے بارے میں نہیں پوچھتا ۔ ان کو صرف بچوں کی سیٹ کی فکر ہوتی ہے۔ ہمیشہ اسکولوں کو جوابدہ ہونا چاہئے اور بچوں کے ماں باپ کو اسکول سے تعاون کرنا چاہئے۔