بنگلور میں سال نو کے جشن میں جنسی ہراسانی کا ایک اور معاملہ؛ ایک اعلیٰ افسر کی بیوی کو بھی نہیں بخشا گیا
بنگلورو۔10/جنوری(ایس او نیوز) سال نو کے جشن کے دوران شہر بھر میں جابجا لڑکیوں پر جنسی ہراسانی اور دست درازی کے واقعات کے دوران اب یہ بات سامنے آئی ہے کہ شہر کے ایک معروف کلب میں ایک وی آئی پی جوڑے کو بھی اسی طرح ہراساں کیا گیا اور اس جوڑے میں شامل خاتون کے ساتھ بدتمیزی کے علاوہ اسے جنسی طور پر ہراساں کرنے کی بھی کوشش کی گئی۔ یہ واقعہ شہر کے کبن پارک میں موجود کرناٹکا لان ٹینس اسوسی ایشن کے احاطہ میں پیش آیا۔
بتایاجاتاہے کہ ریاستی محکمہ کمرشیل ٹیکس کے ڈپٹی کمشنر اپنی بیوی کے ساتھ سال نو کا جشن مناکر لوٹ رہے تھے کہ دس سے زائد شرپسندوں نے ان کی بیوی کو گھیر لیا اور اس سے چھیڑ چھاڑ کی کوشش کی اور ساتھ ہی اسے جنسی طور پر ہراساں کیا۔اس سلسلے میں کبن پارک پولیس تھانہ میں ایک معاملہ درج کیاگیاہے۔ بتایاجاتا ہے کہ کمرشیل ٹیکس ڈپٹی کمشنر کی طرف سے اس سلسلے میں بتائی گئی تفصیلات کی بنیاد پر پولیس نے کبن پارک میں لگائے گئے سی سی ٹی وی کیمروں سے مناظر حاصل کئے اور اسی کی بنیاد پر شیوراج نامی ایک ملزم کو گرفتار کرلیا ہے،جبکہ دیگر حملہ آوروں کی تلاش جاری ہے۔ ڈپٹی کمشنر آف پولیس چندرا گپتا نے یہ بات بتائی۔انہوں نے بتایاکہ 31دسمبر کی آدھی رات کے بعد شہر بھر میں سال نو کے جشن کی آڑ میں جنسی ہراسانیوں کے واقعات یکے بعد دیگر ے سامنے آتے جارہے ہیں۔ اسی سلسلے کی ایک کڑی کے طور پریہ معاملہ بھی منظر عام پر آیا ہے۔ایک اعلیٰ افسر کی بیوی کے ساتھ اس طرح کی بدتمیزی کو حکومت نے کافی سنجید گی سے لیا ہے، عوام میں بھی یہ تاثر ظاہر کیا جارہاہے کہ اعلیٰ افسران کے بیوی بچے اگر محفوظ نہیں ہیں تو پھر عوام کا کیا؟۔ بتایاجاتاہے کہ یہ جوڑا 31دسمبر کو ٹینس اسوسی ایشن میں منعقدہ سال نو کی تقریبات میں حصہ لینے کے بعد باہر آرہا تھا، ان تقر یبات میں ریاست کی دیگر ممتاز شخصیتوں نے بھی حصہ لیا۔ بتایاجاتاہے کہ وہ اور ان کی بیوی جس ٹیبل پر بیٹھے ہوئے تھے وہاں سے اٹھ کر جب وہ کاؤنٹر کے پاس کھانا لینے گئے تو شیوراج اور دیگر پندرہ افراد ٹیبل کے پاس آگئے اور وہاں بدتمیزی شروع کردی، یہاں تک کہ ان لوگوں نے اس خاتون کے ساتھ سیلفی لینے کی بھی کوشش کی اور ساتھ ہی اس کے ساتھ بدکلامی کرنے کے ساتھ اسے جسمانی طور پر بھی ہراساں کرنے کی کوشش کی۔ برگیڈ روڈ، ایم جی روڈ اور کمن ہلی واقعات کے بعد ڈپٹی کمشنر نے اس واقعہ کی اطلاع پولیس کو دینے کا فیصلہ کیا۔ سی سی ٹی وی مناظر کا جائزہ لینے کے بعد پولیس نے تعذیرات ہند کی دفعہ 510,509 اور149 کے تحت مقدمہ درج کیا ہے۔ پولیس نے اس سلسلے میں گرفتار شیوراج سے پوچھ تاچھ کافی سختی سے شروع کردی ہے اور دیگر ملزمین کی گرفتاری کیلئے تلاشی مہم چلارہی ہے۔