بنگلوروشہر کی بوسیدہ عمارتوں کی نشاندہی کرنے میئر کا حکم
بنگلورو،16؍اکتوبر(ایس او نیوز؍عبدالحلیم منصور)شہر کے میئر سمپت راج نے بی بی ایم پی افسران کو ہدایت دی کہ بی بی ایم پی کے سبھی 198 وارڈوں میں بوسیدہ مکانوں کی نشاندہی کریں اور تمام اعداد وشمار کے ساتھ انہیں ایک رپورٹ پیش کی جائے۔آج ایجی پورہ میں سلینڈر دھماکہ کے سبب گرنے والی عمارت کا معائنہ کرنے کے بعد اخبار ی نمائندوں سے بات چیت کرتے ہوئے مےئر نے کہاکہ شہر بھر میں جہاں بھی بوسیدہ عمارتیں موجود ہیں ان کی نشاندہی کرکے 24.7 منصوبے کے تحت ان عمارتوں کی از سر نو تعمیر کی جائے گی۔ میئر نے کہاکہ اس سے پہلے بھی بوسیدہ عمارتوں کی نشاندہی کی گئی ، ایک بار پھر یہ سروے کیا جائے گا اور نئی عمارتوں کی تعمیر کا سلسلہ شروع ہوگا۔ ایجی پورہ میں عمارت گرنے کے متعلق میئر نے کہاکہ افسران کو ہدایت دی گئی ہے کہ اس سلسلے میں مکمل رپورٹ پیش کریں ۔ اس موقع پر وزیر برائے ترقیات بنگلو رکے جے جارج نے ایجی پورہ کی عمارت میں سلینڈر دھماکہ میں ہلاک ہونے والوں کو فی کس پانچ لاکھ روپے معاوضہ دیاجائے گا، جبکہ زخمیوں کو علاج کیلئے 50ہزار روپیوں کی رقم دی جائے گی۔ اس عمارت کا معائنہ کرنے کے بعد وزیر داخلہ رام لنگا ریڈی نے بھی ہلاکت پر افسوس ظاہر کیااور کہاکہ یہ عمارت تقریباً 20 سال پرانی ہوگی ، لیکن اتنی کمزور نہیں تھی۔ ابتدائی تحقیقات کے ذریعہ یہی بات سامنے آئی ہے کہ دھماکہ سلینڈر پھٹنے کے سبب ہوا تاہم پولیس حکام کو ہدایت دی گئی ہے کہ واقعہ کی مکمل جانچ کی جائے۔