بنگلورو،7؍مارچ(ایس او نیوز) ذات اور دھرم کے نام پر تفریق روا رکھنے والا رویہ انسانیت کو شرمسار کرنے والا سلوک ہے۔ اس قسم کا بھید بھاؤ عالم انسانیت کے ساتھ بہت بڑا دھوکہ ہے۔ اس لئے ریاستی عوام کو چاہئے کہ وہ عالم انسانیت کے افکار واقدار حیات اپنے اندر جذب کرلیں۔ ان خیالات کا اظہار ریاستی وزیر اعلیٰ سدارامیا نے کیا۔ بروز چہارشنبہ سنٹرل کالج کرکٹ میدان میں بنگلور سنٹرل یونیورسٹی کا افتتاح کرتے ہوئے وزیراعلیٰ نے کہا کہ تعلیم یافتہ ہونا اہم نہیں ہے۔ بلکہ ذات ودھرم کی بنیاد پر عصبیت کا مظاہرہ نہ کرنا اہم ہے۔ اپنے اندر انسانی صفات کو ہمیشہ زندہ رکھنا سب سے بڑی اور صحیح تعلیم ہے۔ انہوں نے کہاکہ ریاست کے تمام عوام کو عالمی سطح کی تعلیم ملنی چاہئے۔ اس مقصد کی خاطر ایشیا کی سب سے بڑی یونیورسٹی بنگلور یونیورسٹی کو تین حصوں میں تقسیم کیاگیا ہے۔ نئے طورپر قائم ہونے والی بنگلور جنوب اور بنگلور سنٹرل یونیورسٹیز کے لئے درکار تمام بنیادی سہولتیں فراہم کی جائیں گی۔ انہوں نے کہاکہ یونیورسٹی کے طلبہ میں عمدہ تعلیم کے ساتھ ہی عمدہ اخلاق واقدار حیات کا پروان چڑھانا نہایت ضروری ہے۔ اخلاق واطوار سے ہی انسان ہے اور یونیورسٹی کا کام انسان بنانا ہے۔ وزیر برائے اعلیٰ تعلیم بسواراج رایا ریڈی نے کہاکہ وزیراعلیٰ امسال کے بجٹ میں تعلیمی شعبہ کے لئے 28؍کروڑ روپئے مختص کرتے ہوئے علم پرور ہونے کا ثبوت دیاہے۔ تعلیم کے لئے مختص رقوم کو متاثر کن طورپر استعمال کرتے ہوئے ریاست کے ہر شہری کو عمدہ تعلیم دینے کا موقع فراہم کرنا محکمہ تعلیمات عامہ کی ذمہ داری ہے۔ انہوں نے کہاکہ ملک میں گریجویٹ تعلیم حاصل کرنے والوں کی تعداد 24؍فیصد ہوگئی ہے۔ جبکہ ریاست میں گریجویٹ کرنے والوں کی تعداد 28؍فیصد ہے۔ ملک بھر میں تعلیمی میدان میں کرناٹک سرفہرست ریاست ہے۔ انہوں نے کہاکہ اتنا کافی نہیں ہے۔ بلکہ تعلیم کا اچھا ماحول بنانے کے لئے مزید علم پرور اقدامات کئے جانے چاہئیں۔ انہوں نے کہاکہ ڈگری کرنے والی طالبات کے لئے مفت داخلہ کا موقع فراہم کیا گیاہے۔ ریاست کے تمام پی یو سی سال اول کے طلبہ میں مفت لیپ ٹاپ تقسیم کرنے کا آغاز ہوچکاہے۔ رائچور میں ایک نئی یونیورسٹی قائم کی جائے گی۔ اس موقع پر سنٹرل کالج میں تعلیم حاصل کردہ وظیفہ یاب جسٹس ایم این وینکٹ چلپا، سینئر سائنٹسٹ ڈاکٹر روڈھم نرسمہا، سینئر ادیب پروفیسر کے نثار احمد ودیگر کو تہنیت پیش کی گئی۔