بنگلورو۔30/اگست(ایس او نیوز) پچھلے ایک سال کے دوران برہت بنگلور مہانگر پالیکے کا انتظامیہ انتہائی شفاف اور گھپلوں سے پاک رہا ہے۔یہ دعویٰ آج شہر کے میئر منجوناتھ ریڈی نے کیاجو19ستمبر کو اپنی ایک سالہ میعاد مکمل کرنے جارہے ہیں۔آج گووند راج نگر اسمبلی حلقہ میں آنے والے ڈاکٹر راجکمار وارڈ میں ڈاکٹر بی آر امبیڈکر کے مجسمہ کی نقاب کشائی کے سلسلے میں منعقدہ جلسہ سے خطاب کرتے ہوئے انہوں نے کہاکہ سابقہ انتظامیہ میں بھاری گھپلہ کیاگیا اور بڑے پیمانے پر مالی بے قاعدگیاں سامنے آئیں، لیکن کانگریس نے جنتادل (ایس) کی تائید سے جب سے بی بی ایم پی کا انتظامیہ سنبھالا ہے بحیثیت میئر انہوں نے اور ڈپٹی میئر ہیما لتا گوپالیا نے تمام کو اعتماد میں لے کر گھپلوں سے پاک انتظامیہ فراہم کیا ہے۔ سابقہ انتظامیہ میں جو افسران گھپلوں میں ملوث تھے،ان کی نشاندہی کرکے ان کو معطل کیا گیا ہے۔ انہوں نے کہاکہ شہر کی گیارہ اہم عمارتوں کو پچھلے انتظامیہ نے رہن رکھ دیاتھا، موجودہ انتظامیہ نے ان میں چار عمارتوں پر بی بی ایم پی کی ملکیت بحال کردی ہے۔چند ہی دنوں میں مزید تین عمارتوں کو بی بی ایم پی کی ملکیت میں بحال کیا جائے گا۔ شہر میں بڑے نالوں پر غیر قانونی قبضوں کو ہٹانے کیلئے جاری مہم کے سلسلے میں ان الزامات کو میئر نے مسترد کردیا کہ اس مہم کا نشانہ صرف غریبوں کو بنایا جارہاہے۔ انہوں نے کہاکہ ریاستی حکومت نے شہر بنگلور کی ہمہ جہت ترقی یقینی بنانے کیلئے سات ہزار کروڑ روپیوں کی رقم مہیا کرائی ہے۔بڑے نالوں کی تعمیر کیلئے 800کروڑ روپے دئے گئے ہیں۔ ریاستی حکومت کے اس فنڈز سے کئی منصوبے شروع کئے گئے ہیں۔ زیر التوا منصوبوں کو انہوں نے جلد ا جلد تکمیل تک پہنچانے کا وعدہ کیا۔اس موقع پر رکن اسمبلی پریہ کرشنا اور دیگر شخصیات موجود تھیں۔