بنگلورو،22اپریل(ایس او نیوز؍ یواین آئی) کرناٹک میں12مئی کوہونے والے اسمبلی انتخاب کے بعدحکومت بنانے کی کوشش میں مصروف بھارتیہ جنتاپارٹی(بی جے پی)کوآج اس وقت بڑاجھٹکالگا جب اس کے سینئرلیڈر بیلورگوپال کرشن کانگریس میں شامل ہوگئے ۔ضلع شیوبھوگ کے ساگر اسمبلی حلقے سے ٹکٹ نہ ملنے پرمسٹرشیوگوپال کرشن کانگریس میں شامل ہوگئے ۔مسٹربیلورکے کانگریس میں شامل ہونے پرکانگریس کمیٹی کے رکن بی کے ہری پرساد،کرناٹک کانگریس کمیٹی کے ایگزیکٹو صدردنیش گنڈوراؤاوردیگرقائدین نے ان کااستقبال کیا۔مسٹربیلورنے ٹکٹ نہ ملنے پربی جے پی چھوڑنے کافیصلہ کیاتھا۔کانگریس میں شامل ہونے سے پہلے انہوں نے وزیراعلیٰ سدارامیا،ریاستی کانگریس کے صدرجی پرمیشوراورلوک سبھا کے کانگریس لیڈرایم ملیکارجن کھرگے کے ساتھ بات کی تھی۔مسٹربیلور نے بی جے پی پرالزام لگاتے ہوئے کہاکہ بی جے پی جھوٹی پارٹی ہے اورایماندارلوگوں کی پارٹی میں کوئی قدرنہیں ہے ۔میں15سال سے اس پارٹی میں رہاہوں اورپارٹی کے کام کاج سے ناخوش ہوں۔پارٹی کا کوئی اصول نہیں ہے ۔انہوں نے کہاکہ میں بغیر کسی شرط کے کانگریس پارٹی میں شامل ہورہاہوں۔میں نے ساگراسمبلی حلقے کے سینئرکانگریسی لیڈراوروزیرمالیات کاگوڈتمپاکی جیت کے لئے کام کرنے کافیصلہ کیاہے ۔میں دیگرحلقوں میں پارٹی کے امیدواروں کی کامیابی کے لئے اپنی طرف سے بھرپورکوشش کروں گا۔میں چاہتاہوں کہ کانگریس پارٹی ریاست میں حکومت بنائے اورآئندہ الیکشن میں اس سلسلے میں کام کریں۔