بیلتھنگڈی 13؍فروری (ایس او نیوز) یہاں پیش آنے والے ایک المناک حادثے میں باپ نے اپنے ایک بیٹے کی مدد سے دوسرے بیٹے کوچاقو گھونپ کر قتل کرڈالاہے۔

موصولہ رپورٹ کے مطابق یہ خونریز واقعہ کاسبا گاؤں میں پیش آیا ہے جہاں نوین نامی نوجوان کو اس کے باپ منجو ناتھ اور بڑے بھائی راگھو یندرا نے پیٹ اور ران میں چاقو ؤں سے متعدد بار حملہ کرکے موقع پر ہی ہلاک کرڈالا۔ منجو ناتھ اور راگھویندرا کے بارے میں بتایا جاتا ہے کہ وہ شہر میں نجومی کے طور جانے جاتے ہیں جبکہ نوین ان کے خاندانی فارم پر کام کیا کرتا تھا۔ 

یہاں یہ بات یاد رکھنے کی 31دسمبر کی شب کو نئے سال کا جشن منانے کے بعد نشے میں مست ہوکر گھر لوٹنے والے نوین اودھم مچاکر گھر کی کھڑکیوں کے شیشے توڑ ڈالے تھے اورجب گھر والوں نے اسے روکنے کی کوشش کی تھی تو اس نے ٹوٹے ہوئے شیشے سے اپنے باپ منجوناتھ کو زخمی کردیا تھا۔ اس تعلق سے کیس درج ہونے کے بعد پولیس نے نوین کو گرفتا ر کرکے جیل بھیج دیاتھا ۔پھر کچھ دنوں بعد ضمانت پر اس کی رہائی ہوئی تھی۔

بتایا جاتا ہے اس واقعے کے بعد منجو ناتھ اپنے بیٹے نوین سے بہت ہی ناراض تھا اور غصے کی آگ اس کے سینے میں بھڑک رہی تھی۔11فروری کی رات کو 9بجے کھانے کے ٹیبل پر پھر سے زبانی جھگڑا شروع ہوگیا تو منجوناتھ اور راگھویندرا نے چاقوؤں سے نوین پر حملہ کردیا جس کی وجہ سے موقع ہی اس نے دم توڑ دیا۔نوین کی بیوی بے بی کی شکایت پر پولیس نے قتل کا کیس درج کرنے کے ساتھ اپنی ژائیلو کار میں فرار ہونے کی کوشش کررہے دونوں ملزمین کو گرفتار کرلیا ہے۔