اپن انگڈی، 21؍نومبر(ایس او نیوز)بیلتھنگڈی تعلقہ کے کلّیری میں واقع ایک موبائل دکان میں چوری کرنے اور پھر دکان کو نذر آتش کرنے کا جو معاملہ 8نومبر کو پیش آیا تھا اسے اپن انگڈی پولیس نے حل کر لیا ہے او راس ضمن میں 3ملزمین کو گرفتار کرلیا ہے۔

پولیس کی طرف سے جاری رپورٹ کے مطابق گرفتار ملزمین کی شناخت عمر فاروق (24سال)، عبیداللہ عرف عوبئی(24سال)، فاروق (24سال) کے طورپر کی گئی ہے۔ا ن ملزمین کے پاس سے 27 موبائل فون، ایک ٹیمپو، ایک پلسر بائک اور ایکٹیوا ہونڈا ضبط کیے گئے ہیں۔کہاجاتا ہے کہ پولیس کو معتبر ذرائع سے اطلاع ملی تھی کہ بنٹوال کے راستے سے مسروقہ سامان ٹیمپو میں لاد کر بیلتھنگڈی کی طرف بیچنے کے لئے لے جایا جارہا ہے۔پولیس نے منصوبہ بندی کے ساتھ کارروائی کرتے ہوئے نیشنل ہائی وے پر پانجالا نامی مقام پر مذکورہ ٹیمپو کو روک لیا اور مال سمیت ملزمین کو گرفتار کرلیا۔